អនុរដ្ឋមន្ត្រីការបរទេសរុស្ស៊ី លោក Sergey Ryabkov បាននិយាយថា លោកសង្ឃឹមថា កិច្ចព្រមព្រៀងពាណិជ្ជកម្មរវាងឥណ្ឌា និងសហរដ្ឋអាមេរិក នឹងមិនប៉ះពាល់ដល់ទំនាក់ទំនងរុស្ស៊ី-ឥណ្ឌាទេ។

នៅពេលត្រូវស្នើសុំឲ្យ ធ្វើអត្ថាធិប្បាយលើថាតើក្របខ័ណ្ឌសម្រាប់កិច្ចព្រមព្រៀងពាណិជ្ជកម្មបណ្តោះអាសន្នដែលបានព្រមព្រៀងគ្នារវាងឥណ្ឌា និងសហរដ្ឋអាមេរិក អាចប៉ះពាល់ដល់ទំនាក់ទំនងរបស់ឥណ្ឌាជាមួយរុស្ស៊ីឬអត់ លោកបាននិយាយនៅក្នុងបទសម្ភាសន៍ជាមួយសារព័ត៌មាន The Indian Express ថា៖«ខ្ញុំសង្ឃឹមថា លទ្ធផលនៃកិច្ចព្រមព្រៀងនេះ នឹងមិនមានន័យថា យើង [ឥណ្ឌា និងរុស្ស៊ី] រងទុក្ខ ឬជួបប្រទះការលំបាក និងបញ្ហា នៅក្នុងកិច្ចសហប្រតិបត្តិការទេ្វភាគីរបស់យើងនោះទេ»។

លោក Ryabkov ដែលបានចូលរួមក្នុងកិច្ចប្រជុំតំណាងជាន់ខ្ពស់របស់បណ្តារដ្ឋាភិបាលនៃប្រ៊ីក (BRICS) នៅទីក្រុងញូវដែលី បាននិយាយថា៖«ទំហំពាណិជ្ជកម្ម រវាងឥណ្ឌា និងរុស្ស៊ី មានកម្រិតខ្ពស់សមរម្យ ប៉ុន្តែសក្តានុពលកាន់តែខ្ពស់។ ដូច្នេះ ខ្ញុំប្រាកដថា សម្រាប់ឥណ្ឌា គួរតែមានកន្លែងសម្រាប់មនុស្សគ្រប់គ្នា និងសមត្ថភាពក្នុងការធ្វើកិច្ចសហប្រតិបត្តិការជាមួយមនុស្សគ្រប់គ្នា។ អ្វីដែលជាបញ្ហាជាមួយគោលនយោបាយបច្ចុប្បន្នរបស់សហរដ្ឋអាមេរិកគឺថា ពួកគេចង់បានអ្វីៗគ្រប់យ៉ាងសម្រាប់ខ្លួនឯង និងគ្មានអ្វីសម្រាប់អ្នកដទៃទេ។ នេះគឺជាវិធីសាស្រ្តឯកតោភាគីនៅក្នុងស្ថានភាពអាក្រក់បំផុត»។

ប្រមុខការទូតរុស្ស៊ីរូបនេះ បានច្រានចោលពន្ធគយ និង «វិធានការបង្ខិតបង្ខំគ្រប់ប្រភេទ»ថា ជា «មធ្យោបាយដែលមិនអាចទទួលយកបាន ដើម្បីបង្កើតការត្រួតត្រាអំណាចតែមួយ»។ «ខ្ញុំនិយាយដូច្នេះដោយត្រង់ៗ ពីព្រោះមិនមានវិធីផ្សេងទៀត ដើម្បីពន្យល់ពីអ្វីដែលកំពុងកើតឡើងនោះទេ។ ប្រទេសដទៃទៀត ដែលជឿលើពហុភាគីនិយម គិតថា កិច្ចសហប្រតិបត្តិការ និងផលប្រយោជន៍ទៅវិញទៅមក គឺជាមធ្យោបាយ ដើម្បីរីកចម្រើន និងធានាថា យើងរួមគ្នាដោះស្រាយបញ្ហា និងទប់ទល់នឹងបញ្ហាប្រឈមនានា» លោកបានបន្ថែម ដោយធ្វើអត្ថាធិប្បាយលើជំហររបស់បBRICS លើបញ្ហានេះ៕