នគរបាលកាណាដា បានបញ្ជាក់កាលពីថ្ងៃពុធ (១១ កុម្ភៈ) ថា ជនសង្ស័យក្នុងការបាញ់ប្រហារដ៏រន្ធត់បំផុតមួយ នៅវិទ្យាល័យមួយកន្លែងនៅភាគខាងលិចប្រទេសកាណាដា គឺជាស្ត្រីវ័យ ១៨ឆ្នាំម្នាក់ (ភេទទីបី) ដែលមានបញ្ហាសុខភាពផ្លូវចិត្ត ខណៈស្រ្តីរូបនេះក៏បានសម្លាប់ម្តាយនិងប្អូនប្រុសចុងរបស់ខ្លួន មុនពេលបន្តទៅបាញ់ប្រហារនៅសាលារៀនចាស់របស់នាង ប៉ុន្តែក្រុមអ្នកស៊ើបអង្កេត មិនបានផ្តល់ហេតុផលពីក្រោយហេតុការណ៍សម្លាប់រង្គាលដ៏អាក្រក់បំផុតមួយនៅក្នុងប្រវត្តិសាស្ត្រកាណាដានេះទេ។

ឃាតករ ដែលនគរបាលបានកំណត់អត្តសញ្ញាណថាឈ្មោះ នាង Jesse Van Rootselaar បានស្លាប់ដោយការធ្វើអត្តឃាត បន្ទាប់ពីការបាញ់ប្រហារកាលពីថ្ងៃអង្គារសប្ដាហ៍នេះ នៅតំបន់ Tumbler Ridge ដែលជាសហគមន៍ដាច់ស្រយាលមួយមានប្រជាជនសរុបត្រឹមតែ ២.៤០០នាក់ប៉ុណ្ណោះ ក្នុងខេត្ត British Columbia នៃមហាសមុទ្រប៉ាស៊ីហ្វិក។ នគរបាលបានកែសម្រួលចំនួនអ្នកស្លាប់សរុបមកត្រឹម ៩នាក់ រួមទាំងខ្មាន់កាំភ្លើងផងដែរ ពីចំនួន ១០ នាក់ដែលបានរាយការណ៍ដំបូង។ 

លោក Dwayne McDonald អនុប្រធាននគរបាលជាតិកាណាដា នៅខេត្ត British Columbia បាននិយាយថា នាង Van Rootselaar ត្រូវបានចាប់ខ្លួនលើសពី ១ដង ក្រោមច្បាប់សុខភាពផ្លូវចិត្តរបស់ខេត្ត ដើម្បីយកទៅវាយតម្លៃ។ នាងធ្លាប់បានរៀននៅសាលាកើតហេតុនេះ ប៉ុន្តែបានបោះបង់ការសិក្សាកាលពី ៤ឆ្នាំមុន។ ប្រមុខនគរបាលរូបនេះបានសង្កត់ធ្ងន់ថា ជនសង្ស័យ Van Rootselaar បានកើតមកជាភេទប្រុស ប៉ុន្តែបានចាប់ផ្តើមកំណត់អត្តសញ្ញាណខ្លួនឯងថាជាមនុស្សស្រី កាលពី ៦ឆ្នាំមុន។

លោកនាយករដ្ឋមន្ត្រី Mark Carney ប្រាប់អ្នកយកព័ត៌មានទាំងទឹកមុខក្រៀមក្រំថា «កាណាដានឹងឆ្លងកាត់រឿងនេះឱ្យបាន» ខណៈលោកពន្យារពេលដំណើរទស្សនកិច្ចទៅកាន់ទ្វីបអឺរ៉ុប ហើយបញ្ជាឱ្យទង់ជាតិលើអគាររដ្ឋាភិបាលទាំងអស់ ត្រូវបង្ហូតពាក់កណ្តាលដង សម្រាប់រយៈពេល ៧ថ្ងៃបន្ទាប់។ មិនដូចនៅសហរដ្ឋអាមេរិកនោះទេ ការបាញ់ប្រហារនៅសាលារៀនកាណាដា ស្ទើរតែមិនធ្លាប់មានសោះ៕