រដ្ឋបាលខេត្តសុងក្លា របស់ប្រទេសថៃ បាននិយាយនៅលើប្រព័ន្ធផ្សព្វផ្សាយសង្គមថា ស្រ្តីម្នាក់ដែលជាគ្រូបង្រៀន បានស្លាប់នៅថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦នេះ នៅក្នុងស្រុកហាត់យ៉ៃ ភាគខាងត្បូងប្រទេសថៃ បន្ទាប់ពីខ្មាន់កាំភ្លើងម្នាក់ បានបើកការបាញ់ប្រហារនៅសាលារៀនមួយកន្លែងនៅទីនោះ។

យុវជនវ័យ ១៧ ឆ្នាំម្នាក់ បានប្រើអាវុធដែលលួចពីមន្ត្រីនគរបាលមួយរូប ដើម្បីបាញ់សម្លាប់គ្រូបង្រៀនម្នាក់ ឈ្មោះថា Sasiphat Sinsamosorn នៅសាលារៀន Patongprathankiriwat ក្នុងស្រុក ហាត់យ៉ៃ ខេត្ត សុងក្លា កាលពីថ្ងៃពុធម្សិលមិញនេះ មុនពេលត្រូវបាននគរបាលឃាត់ខ្លួន។ សិស្សស្រីម្នាក់ក៏ត្រូវបានបាញ់ផងដែរ ប៉ុន្តែព័ត៌មានពីស្ថានភាពសិស្សរូបនោះ មិនទាន់ចេញផ្សាយនៅឡើយទេ។

ក្រសួងសុខាភិបាលថៃ បាននិយាយថា អ្នកគ្រូ Sasiphat ដែលក៏បានកាន់តួនាទីជានាយកសាលាផងដែរនោះ ត្រូវបានបញ្ជូនទៅមន្ទីរពេទ្យដើម្បីវះកាត់ ប៉ុន្តែបានស្លាប់ដោយសារតែរបួសសរីរាង្គខាងក្នុង និងការបាត់បង់ឈាមច្រើនពេក។ ក្រុមមន្ត្រីបាននិយាយថា ជនសង្ស័យដែលត្រូវបានឃុំខ្លួន មានប្អូនស្រីម្នាក់រៀននៅសាលានោះ ហើយរូបគេមានប្រវត្តិប្រើប្រាស់គ្រឿងញៀន និងទើបតែត្រូវបានអនុញ្ញាតឱ្យចេញពីមន្ទីរពេទ្យផ្លូវចិត្ត ក្នុងខែធ្នូកន្លងទៅ។

គួរឱ្យដឹងថា អំពើហិង្សាដោយកាំភ្លើង និងការកាន់កាប់អាវុធ មិនមែនជារឿងចម្លែកទេនៅប្រទេសថៃ។ កាលពីឆ្នាំ២០០២ អតីតមន្ត្រីនគរបាលម្នាក់បានសម្លាប់មនុស្ស ៣៦នាក់ រួមទាំងកុមារ ២២នាក់ ក្នុងការវាយប្រហារដោយប្រើកាំភ្លើងនិងកាំបិត នៅសាលាមត្តេយ្យមួយកន្លែងនៅភាគខាងកើតនៃប្រទេសថៃ៕