សម្ព័ន្ធយោធ NATO បាននិយាយកាលពីថ្ងៃពុធ ទី១១ ខែកុម្ភៈ ថា ខ្លួនបានចាប់ផ្តើមបេសកកម្មមួយដើម្បីពង្រឹងវត្តមាននៅក្នុងតំបន់មហាសមុទ្រអាកទិក ជាផ្នែកមួយនៃកិច្ចព្រមព្រៀងដើម្បីបន្ធូរបន្ថយភាពតានតឹងធ្ងន់ធ្ងរ ដែលជំរុញដោយបំណងប្រាថ្នារបស់លោកប្រធានាធិបតីអាមេរិក Donald Trump សម្រាប់សហរដ្ឋអាមេរិកក្នុងការយកមកគ្រប់គ្រងដែនដីហ្គ្រីនលែន។

អគ្គលេខាធិការលោក Mark Rutte បាននិយាយថា បេសកកម្មថ្មីដែលមានឈ្មោះថា Arctic Sentry នឹងសម្របសម្រួលវត្តមានយោធាកាន់តែច្រើនរបស់សម្ព័ន្ធមិត្តណាតូនៅក្នុងតំបន់ រួមទាំងសមយុទ្ធដូចជាសមយុទ្ធ Arctic Endurance របស់ប្រទេសដាណឺម៉ាកនៅតំបន់ហ្គ្រីនលែន។

លោក Rutte បាននិយាយថា «វានឹងបានប្រយោជន៍ពីកម្លាំងរបស់សម្ព័ន្ធយោធាណាតូដើម្បីការពារទឹកដីរបស់យើង និងធានាបានថាតំបន់អាកទិក និងតំបន់ High North នៅតែមានសុវត្ថិភាព»។

សម្ព័ន្ធយោធាណាតូ បានចាប់ផ្តើមរៀបចំផែនការសម្រាប់បេសកកម្មនេះ បន្ទាប់ពីលោក Trump និងលោក Rutte បានជួបពិភាក្សានៅទីក្រុង Davos កាលពីខែមុន នៅពេលដែលវិបត្តិដែនដីហ្គ្រីនលែនឈានដល់កម្រិតខ្ពស់បង្កឡើងដោយការទទូចចង់បានរបស់លោក Trump ថាសហរដ្ឋអាមេរិកត្រូវតែជាម្ចាស់ដែនដីនេះ ដែលជាផ្នែកមួយរបស់សម្ព័ន្ធមិត្តណាតូ គឺប្រទេសដាណឺម៉ាក។

លោក Rutte និងលោក Trump បានព្រមព្រៀងថា សម្ព័ន្ធយោធាណាតូនឹងមានតួនាទីកាន់តែធំធេងក្នុងការការពារតំបន់មហាសមុទ្រអាកទិក ខណៈប្រទេសដាណឺម៉ាក សហរដ្ឋអាមេរិក និងដែនដីហ្គ្រីនលែន នឹងពិភាក្សាបន្ថែមទៀតអំពីដែនដីហ្គ្រីនលែន។