ជើងហោះហើរចូលនិងចេញពីទីក្រុង El Paso ជាប់ព្រំដែនរដ្ឋតិចសាស់បានបន្តឡើងវិញកាលពីថ្ងៃពុធ បន្ទាប់ពីរដ្ឋាភិបាលសហរដ្ឋអាមេរិក បានដកចេញបម្រាមចរាចរណ៍ផ្លូវអាកាស។ មន្ត្រីរដ្ឋាភិបាល និងក្រុមហ៊ុនអាកាសចរណ៍ បាននិយាយថារដ្ឋបាលអាកាសចរណ៍សហព័ន្ធ(FAA) បានបិទដែនអាកាសដោយសារតែការព្រួយបារម្ភថា ប្រព័ន្ធប្រឆាំងយានដ្រូនបំពាក់ឡាស៊ែរ កំពុងត្រូវបានសាកល្បងដោយកងទ័ពសហរដ្ឋអាមេរិក អាចបង្កហានិភ័យដល់ការធ្វើចរាចរណ៍ផ្លូវអាកាស។

រដ្ឋបាលអាកាសចរណ៍សហព័ន្ធ(FAA) បានដកចេញការរឹតត្បិតរបស់ខ្លួន បន្ទាប់ពីកងទ័ពបានយល់ព្រមធ្វើការសាកល្បងសុវត្ថិភាពបន្ថែមទៀត មុនពេលប្រើប្រាស់ប្រព័ន្ធនេះ ដែលកំពុងត្រូវបានសាកល្បងនៅតំបន់ Fort Bliss នៅជាប់អាកាសយានដ្ឋានអន្តរជាតិ El Paso។

លោក Sean Duffy រដ្ឋមន្ត្រីក្រសួងដឹកជញ្ជូនសហរដ្ឋអាមេរិក ដែលត្រួតពិនិត្យរដ្ឋបាលអាកាសចរណ៍សហព័ន្ធ(FAA) បាននិយាយថា ការបិទនេះត្រូវបានជំរុញដោយការលុកលុយរបស់យានដ្រូនដោយក្រុមជួញដូរគ្រឿងញៀននៅម៉ិកស៊ិក។ ទោះជាយ៉ាងណា ការឃើញយានដ្រូននៅជិតអាកាសយានដ្ឋានជាធម្មតានឹងនាំឱ្យមានការផ្អាកចរាចរណ៍មួយរយៈពេលខ្លី។

លោក Renard Johnson អភិបាលក្រុង El Paso បាននិយាយថា រដ្ឋបាលអាកាសចរណ៍សហព័ន្ធ(FAA) ពុំបានទាក់ទងទៅអាកាសយានដ្ឋាន ប្រធាននគរបាល ឬមន្ត្រីមូលដ្ឋានផ្សេងទៀតនោះទេ មុនពេលបិទដែនអាកាស។