ស្ថានីយ៍ទូរទស្សន៍ក្នុងស្រុកបានបង្ហាញថា គណបក្សជាតិនិយមបង់ក្លាដែស (BNP) របស់លោក Tarique Rahman បានឈ្នះការបោះឆ្នោតសភាដ៏សំខាន់មួយនៅថ្ងៃសុក្រ១៣កុម្ភៈនេះ ខណៈសន្លឹកឆ្នោតត្រូវបានរាប់ពេញមួយយប់នៅក្នុងការបោះឆ្នោតជាប្រវត្តិសាស្ត្រ ដែលត្រូវគេរំពឹងថានឹងស្តារស្ថិរភាពនយោបាយឡើងវិញ។

ការបោះឆ្នោតសភាដែលបានធ្វើឡើងកាលពីថ្ងៃព្រហស្បតិ៍១២កុម្ភៈសប្ដាហ៍នេះ គឺជាការបោះឆ្នោតលើកដំបូងរបស់ប្រទេសបង់ក្លាដែសចាប់តាំងពីការបះបោរដែលជំរុញដោយចលនា Gen Z កាលពីឆ្នាំ ២០២៤ ដែលបានផ្តួលរំលំនាយករដ្ឋមន្ត្រីលោកស្រី Sheikh Hasina។ 

លទ្ធផលច្បាស់លាស់មួយត្រូវបានគេមើលឃើញថាមានសារៈសំខាន់សម្រាប់ស្ថិរភាពនៅក្នុងប្រទេស កាន់សាសនាអ៊ីស្លាមភាគច្រើន ចំនួន ១៧៥ លាននាក់ បន្ទាប់ពីភាពចលាចលប្រឆាំងនឹងលោកស្រី Hasina ដ៏សាហាវអស់រយៈពេលជាច្រើនខែបានរំខានដល់ជីវិតប្រចាំថ្ងៃ និងបានប៉ះពាល់ដល់ឧស្សាហកម្មសំខាន់ៗ រួមទាំងវិស័យកាត់ដេរនៅក្នុងប្រទេសនាំចេញធំជាងគេទីពីររបស់ពិភពលោក។    

ប៉ុស្តិ៍ទូរទស្សន៍ខាងលើបានបង្ហាញថា នៅព្រឹកថ្ងៃសុក្រសប្ដាហ៍នេះ គណបក្ស BNP ទទួលបានសំឡេងគាំទ្រ២០៩ អាសនៈនៅក្នុងសភា House of the Nation ដែលមានអាសនៈសរុប៣០០ ដោយឆ្លងផុតយ៉ាងងាយស្រួលសម្រាប់សំឡេងភាគច្រើនដាច់ខាត។

គួររម្លឹកថា អង្គការសហប្រជាជាតិបានប៉ាន់ប្រមាណថា មនុស្សប្រមាណ១.៤០០នាក់ បានស្លាប់អំឡុងការបង្ក្រាបការតវ៉ាកាលពីឆ្នាំមុន នៅពេលដែលចលនានិស្សិតក្រោកបះបារប្រឆាំងនឹងរដ្ឋាភិបាលរយៈពេលជាង៣សប្ដាហ៍៕