សមាជិកសភាអាមេរិកមួយក្រុម ចំនួន ៣៧រូប មកពីបក្សនយោបាយទាំងពីររបស់ទីក្រុងវ៉ាស៊ីនតោន បានសរសេរលិខិតទៅកាន់អ្នកនយោបាយជាន់ខ្ពស់កោះតៃវ៉ាន់ ដោយសម្តែងក្ដីបារម្ភអំពីការពន្យារពេលនៃសំណើចំណាយលើវិស័យការពារជាតិ ដោយលើកឡើងពី សម្ពាធកាន់តែខ្លាំងរបស់ប្រទេសចិន។

មេដឹកនាំកោះតៃវ៉ាន់ លោក Lai Ching-te កាលពីឆ្នាំមុន បានស្នើថវិកាបន្ថែមចំនួន ៤០ ពាន់លានដុល្លារ សម្រាប់វិស័យការពារជាតិ ដើម្បីទប់ទល់នឹងប្រទេសចិន ដែលចាត់ទុកកោះតៃវ៉ាន់ថាជាទឹកដីរបស់ខ្លួន។ ប៉ុន្តែបក្សប្រឆាំង ដែលមានសំឡេងភាគច្រើនក្នុងសភាតៃវ៉ាន់ បានបដិសេធមិនពិនិត្យសំណើនេះទេ ហើយជំនួសមកវិញ បានលើកសំណើផ្ទាល់ខ្លួនដែលមានតម្លៃថោកជាងនេះ ដែលផ្តល់មូលនិធិសម្រាប់ការទិញអាវុធអាមេរិកមួយចំនួនប៉ុណ្ណោះ។

លិខិតរបស់សមាជិកសភាអាមេរិកនោះ បានផ្ញើជូនប្រធានសភាកោះតៃវ៉ាន់ លោក Han Kuo-yu ដែលជាប្រធានគណបក្សប្រឆាំងគួមីនតាំង (KMT) ព្រមទាំងជូនដល់គណបក្សប្រជាជនតៃវ៉ាន់ (TPP) ក៏ដូចជាសមាជិកសភានៃគណបក្សប្រជាធិបតេយ្យជឿនលឿន ដែលកំពុងកាន់អំណាចរបស់កោះនេះ។ លិខិតនោះនិយាយថា អាមេរិកត្រូវតែដោះស្រាយបញ្ហាកកស្ទះដ៏ច្រើនសន្ធឹកសន្ធាប់នៃការដឹកជញ្ជូនអាវុធទៅឱ្យតៃវ៉ាន់ ប៉ុន្តែតៃវ៉ាន់ខ្លួនឯងផ្ទាល់ ក៏ត្រូវចាត់វិធានការផងដែរ។

សមាជិកសភាអាមេរិកមួយចំនួនផ្សេងទៀត ក៏បានសម្តែងក្ដីបារម្ភជាសាធារណៈអំពីថវិកាដែលជាប់គាំងនេះ។ ទាំងបក្ស KMT និងបក្ស TPP របស់កោះតៃវ៉ាន់ បាននិយាយថា ពួកគេគាំទ្រការចំណាយលើវិស័យការពារជាតិ ប៉ុន្តែនឹងមិនចុះហត្ថលេខាលើ «មូលប្បទានប័ត្រគ្មានសាច់ប្រាក់» នោះទេ ហើយថា ពួកគេមានកាតព្វកិច្ចត្រួតពិនិត្យយ៉ាងពេញលេញនូវសំណើថវិកាទាំងអស់៕