កសិករ និងសហជីពការងាររបស់ប្រទេសឥណ្ឌា បានតវ៉ានៅទូទាំងប្រទេស ដោយរិះគន់ក្របខ័ណ្ឌសម្រាប់កិច្ចព្រមព្រៀងពាណិជ្ជកម្មបណ្តោះអាសន្នរវាងប្រទេសឥណ្ឌានិងសហរដ្ឋអាមេរិក ដែលបានឈានដល់កាលពីសប្តាហ៍មុន ដែលពួកគេនិយាយថាជាការគំរាមកំហែងដល់ជីវភាពរស់នៅរបស់ពួកគេ។

នៅក្នុងសេចក្តីថ្លែងការណ៍រួមមួយ ប្រទេសឥណ្ឌា និងសហរដ្ឋអាមេរិកបាននិយាយថា ពួកគេបានឈានដល់ក្របខ័ណ្ឌសម្រាប់កិច្ចព្រមព្រៀងបណ្តោះអាសន្នទាក់ទងនឹងពាណិជ្ជកម្មបដិការ និងផ្តល់ផលប្រយោជន៍ទៅវិញទៅមក។ យោងតាមសេចក្តីថ្លែងការណ៍រួមបានឲ្យដឹងថា ភាគីសហរដ្ឋអាមេរិកនឹងអនុវត្តអត្រាដំឡើងពន្ធបដិការ ១៨ ភាគរយលើទំនិញមានប្រភពដើមពីប្រទេសឥណ្ឌា រួមមានវាយនភណ្ឌ និងសម្លៀកបំពាក់ ផលិតផលស្បែកនិងស្បែកជើង ផ្លាស្ទិច និងកៅស៊ូ សារធាតុគីមីសរីរាង្គ គ្រឿងតុបតែងផ្ទះ ផលិតផលសិប្បកម្ម និងគ្រឿងចក្រមួយចំនួនទៀត។

សេចក្តីថ្លែងការណ៍រួមបាននិយាយថា ភាគីទាំងពីរនឹងអនុវត្តក្របខ័ណ្ឌនេះភ្លាមៗ និងធ្វើការឆ្ពោះទៅរកការបញ្ចប់ឯកសារកិច្ចព្រមព្រៀងបណ្តោះអាសន្ន។ កសិករនៅក្នុងប្រទេសឥណ្ឌាបានព្រមានថា ការបើកទ្វារឱ្យសហគ្រាសអាមេរិក ប្រឈមនឹងហានិភ័យនៃការរុញច្រានវិស័យកសិកម្មរបស់ឥណ្ឌាដែលកំពុងជួបការលំបាករួចទៅហើយ ឱ្យធ្លាក់ចូលទៅក្នុងវិបត្តិកាន់តែជ្រៅ។ សហជីពការងារបានចូលរួមក្នុងការតវ៉ារបស់កសិករ ដោយហៅកិច្ចព្រមព្រៀងនេះថាជាការគំរាមកំហែងដោយផ្ទាល់មិនត្រឹមតែចំពោះវិស័យកសិកម្ម និងផលិតផលទឹកដោះគោប៉ុណ្ណោះទេ ប៉ុន្តែថែមទាំងចំពោះកម្មករផ្សេងទៀតផងដែរ។ យោងតាមកិច្ចព្រមព្រៀងពាណិជ្ជកម្ម ទីផ្សារឥណ្ឌានឹងត្រូវបានបើកចំហសម្រាប់ផលិតផលកសិកម្មរបស់សហរដ្ឋអាមេរិក ដែលផ្តល់អត្ថប្រយោជន៍ដល់កសិករអាមេរិក។ កិច្ចព្រមព្រៀងនេះអំពាវនាវឱ្យប្រទេសឥណ្ឌាលុបឬកាត់បន្ថយការដំឡើងពន្ធលើទំនិញឧស្សាហកម្មទាំងអស់របស់សហរដ្ឋអាមេរិក និងផលិតផលម្ហូបអាហារ និងកសិកម្មជាច្រើនប្រភេទផ្សេងទៀតរបស់មេរិក។