យោងតាមសេចក្តីថ្លែងការណ៍ផ្លូវការមួយដែលចេញផ្សាយកាលពីថ្ងៃព្រហស្បតិ៍ (ទី១២ ខែកុម្ភៈ ឆ្នាំ២០២៦) បានឲ្យដឹងថា ប្រទេសចិនបានជំរុញឲ្យហុងគ្រីដើរតួនាទីយ៉ាងសកម្ម ក្នុងការធានាវឌ្ឍនភាពដ៏រឹងមាំនៃទំនាក់ទំនងចិន-សហភាពអឺរ៉ុប (EU)។

ក្រសួងការបរទេសចិនបានឲ្យដឹងថា រដ្ឋមន្ត្រីការបរទេសចិន លោក Wang Yi ដែលបានទៅដល់ទីក្រុង Budapest កាលពីថ្ងៃពុធ បានជួបពិភាក្សាជាមួយនាយករដ្ឋមន្ត្រី លោក Viktor Orban ស្តីពីទំនាក់ទំនងទ្វេភាគី។

ក្នុងជំនួបនោះ លោក Wang បានប្រាប់លោក Orban ថា៖ «រឿងរ៉ាវដ៏ជោគជ័យនៃកិច្ចសហប្រតិបត្តិការចិន-ហុងគ្រី នឹងមានឥទ្ធិពលជាវិជ្ជមាន ទាំងសម្រាប់អឺរ៉ុប និងពិភពលោក ហើយប្រទេសចិនទន្ទឹងរង់ចាំឃើញប្រទេសហុងគ្រីដើរតួនាទីវិជ្ជមាន ក្នុងការលើកកម្ពស់វឌ្ឍនភាពដ៏ល្អប្រសើរនៃទំនាក់ទំនងចិន-សហភាពអឺរ៉ុប»។

ជាមួយគ្នានេះ ដោយពោលសរសើរគោលនយោបាយមិត្តភាពយូរអង្វែងរបស់ហុងគ្រី ចំពោះទីក្រុងប៉េកាំង លោក Wang បានពិពណ៌នាអំពីប្រទេសចិនថា ជាដៃគូយុទ្ធសាស្ត្ររយៈពេលវែងដែលអាចទុកចិត្តបាន និងបានបង្ហាញទំនុកចិត្តថា ទីក្រុង Budapest នឹងបន្តផ្តល់ការគាំទ្រយ៉ាងរឹងមាំ លើបញ្ហាទាក់ទងនឹងផលប្រយោជន៍ស្នូលរបស់ចិន។

ចំណែកលោក Orban បាននិយាយថា ប្រទេសហុងគ្រីកោតសរសើរ ចំពោះសមិទ្ធផលដ៏មានវឌ្ឋនភាពរបស់ប្រទេសចិន និងស្វាគមន៍ការវិនិយោគដែលកើនឡើង ដោយកត់សម្គាល់ថា ក្រុមហ៊ុនចិនស្ថិតក្នុងចំណោមវិនិយោគិនឈានមុខគេរបស់ប្រទេស។ ហើយលោកបានបន្ថែមថា គម្រោងផ្លូវដែក Budapest-Belgrade ត្រូវបានគេរំពឹងថា នឹងជំរុញកំណើនសេដ្ឋកិច្ច និងលើកកម្ពស់ស្តង់ដារជីវភាព៕