នៅថ្ងៃសុក្រ (ទី១៣ ខែកុម្ភៈ ឆ្នាំ២០២៦) នេះ អាជ្ញាធរ បានប្រាប់ឲ្យដឹងថា ប្រទេសជប៉ុនបានឃាត់ទូកនេសាទចិន ១គ្រឿង និងចាប់ខ្លួនប្រធានកាពីតែនរបស់ទុកនោះ ជាឧប្បត្តិហេតុមួយដែលអាចធ្វើឲ្យជម្លោះរវាងប្រទេសយក្សអាស៊ីទាំង២ កាន់តែខ្លាំងឡើងៗ។

ហេតុការណ៍ នាថ្ងៃព្រហស្បតិ៍ នៅភាគខាងត្បូងប្រទេសជប៉ុននេះ បានកើតឡើង ៣ខែបន្ទាប់ពីនាយករដ្ឋមន្ត្រី លោកស្រី Sanae Takaichi បានលើកឡើងថា ជប៉ុននឹងធ្វើអន្តរាគមន៍យោធា ប្រសិនបើទីក្រុងប៉េកាំងព្យាយាមដណ្ដើមយកកោះតៃវ៉ាន់ដោយកម្លាំង។

ទីភ្នាក់ងារនេសាទជប៉ុន បានបញ្ជាក់ថា៖ «កាពីតែននាវា ត្រូវបានបញ្ជាឲ្យឈប់ ដើម្បីឲ្យអធិការកិច្ចនេសាទត្រួតពិនិត្យ ប៉ុន្តែនាវាមិនបានគោរពតាម ហើយបានព្យាយាមគេច»។ ទីភា្នក់ងារនេះបានឲ្យដឹងនៅក្នុងសេចក្តីថ្លែងការណ៍មួយថា៖ «ដោយហេតុនេះ កាពីតែននាវាត្រូវបានចាប់ខ្លួននៅថ្ងៃដដែលនោះ»។

សេចក្តីថ្លែងការណ៍របស់ជប៉ុន បានឲ្យដឹងថា ទូកនេះស្ថិតនៅក្នុងតំបន់សេដ្ឋកិច្ចផ្តាច់មុខរបស់ជប៉ុន ចម្ងាយ ៨៩,៤ម៉ាយល៍ណត់ (១៦៦គីឡូម៉ែត្រ) នៅភាគនិរតីនៃកោះ Meshima ក្នុងប្រជុំកោះ Goto ដែលមិនមែនជាតំបន់មានជម្លោះឡើយ។

ចិនមិនទាន់បានធ្វើអត្ថាធិប្បាយអ្វីនៅឡើយទេ ពាក់ព័ន្ធនឹងហេតុការណ៍នេះ។ នេះជាលើកដំបូងគិតចាប់តាំងពីឆ្នាំ២០២២ ដែលទីភ្នាក់ងារនេសាទជប៉ុន បានឃាត់ទូកនេសាទចិន។ អ្នកនាំពាក្យរដ្ឋាភិបាលជាន់ខ្ពស់ លោក Minoru Kihara បាននិយាយថា៖ «ដើម្បីទប់ស្កាត់ការនេសាទខុសច្បាប់ដោយនាវាបរទេស យើងនឹងបន្តចាត់វិធានការយ៉ាងម៉ឺងម៉ាត់ និងចូលរួមក្នុងវិធានការអនុវត្តច្បាប់»។

គួរបញ្ជាក់ថា ចិនមានជម្លោះទឹកដីជាច្រើនជាមួយជប៉ុន ហើយមានឧប្បត្តិហេតុម្តងហើយម្តងទៀត ជុំវិញកោះ Senkaku ដែលគេស្គាល់ថា ជាកោះ Diaoyu នៅក្នុងប្រទេសចិន៕