រដ្ឋាភិបាលអ៊ីរ៉ង់ នៅថ្ងៃសុក្រ (ទី១៣ ខែកុម្ភៈ ឆ្នាំ២០២៦) នេះ បានប្រកាសអំពីការបង្កើតគណៈកម្មការពិសេសមួយ ដើម្បីស៊ើបអង្កេតការតវ៉ាប្រឆាំងនឹងការចំណាយខ្ពស់នៃការរស់នៅ ដែលបានប្រែក្លាយទៅជាការជួបជុំប្រឆាំងរដ្ឋាភិបាល ពោលគឺជាហេតុការណ៍ដ៏អាក្រក់ដែលបានបណ្តាលឲ្យមនុស្សរាប់ពាន់នាក់បាត់បង់ជីវិត។

អ្នកនាំពាក្យរដ្ឋាភិបាលអ៊ីរ៉ង់ លោកស្រី Fatemeh Mohajerani បានប្រាប់ទីភ្នាក់ងារសារព័ត៌មានក្នុងស្រុក ISNA ថា៖ «គណៈកម្មាធិការស្វែងរកការពិតនេះ ត្រូវបានបង្កើតឡើង ដោយមានតំណាងមកពីស្ថាប័នពាក់ព័ន្ធ ហើយកំពុងប្រមូលឯកសារ និងស្ដាប់សេចក្តីថ្លែងការណ៍នានា»។

តែយ៉ាងណាក្ដី ស្ដ្រីអ្នកនាំពាក្យរូបនេះមិនបានបញ្ជាក់ថា តើគណៈកម្មការនេះនឹងផ្តោតលើតែការតវ៉ាសេដ្ឋកិច្ច ឬថា តើក្រុមនេះនឹងស៊ើបអង្កេតការស្លាប់ អំឡុងការតវ៉ានេះដែរ ឬអត់។ លោកស្រីបានប្រាប់ថា៖ «របាយការណ៍ចុងក្រោយនឹងត្រូវបានចេញផ្សាយ សម្រាប់ព័ត៌មានសាធារណៈ និងសកម្មភាពផ្លូវច្បាប់បន្ថែមទៀត បន្ទាប់ពីដំណើរការត្រូវបានបញ្ចប់»។

កាលពីថ្ងៃព្រហស្បតិ៍ គេហទំព័ររដ្ឋាភិបាលបានចេញផ្សាយការអត្ថាធិប្បាយរបស់ប្រធានាធិបតី លោក Masoud Pezeshkian ដែលបាននិយាយថា «យើងបានចាត់តាំងឲ្យក្រុមស៊ើបអង្កេតរកមូលហេតុ (នៃភាពចលាចល)» ដោយមិនផ្តល់ព័ត៌មានលម្អិតបន្ថែមឡើយ។

យោងតាមការរាប់ជាផ្លូវការ បានបង្ហាញថា ការតវ៉ា ដែលបានចាប់ផ្តើមនៅចុងខែធ្នូឆ្នាំមុន មុនពេលកើនឡើងខ្លាំងទៅៗ នៅថ្ងៃទី៨ ខែមករាឆ្នាំនេះ បានបណ្តាលឲ្យមនុស្សជាង ៣.០០០នាក់ស្លាប់។ តែទីភ្នាក់ងារសារព័ត៌មានសកម្មជនសិទ្ធិមនុស្ស (HRANA) ដែលមានមូលដ្ឋាននៅសហរដ្ឋអាមេរិក រាយការណ៍ថា យ៉ាងហោចណាស់មានមនុស្ស ៧.០០៥នាក់ ត្រូវបានសម្លាប់ក្នុងអំឡុងពេលមានការតវ៉ាដ៏ខ្លាំងក្លា៕