ស្ថាប័នឃ្លាំមើលអាកាសចរណ៍ស៊ីវិលរបស់ឥណ្ឌា បានពិន័យក្រុមហ៊ុនអាកាសចរណ៍ Air India ចំនួន ១១០.៣៥០ដុល្លារ ដោយសារការហោះហើរយន្តហោះ Airbus ៨លើក ដោយមិនមានលិខិតអនុញ្ញាតហោះហើរ ដោយលើកឡើងថា កំហុសនេះបានធ្វើឲ្យប៉ះពាល់ដល់ទំនុកចិត្តសាធារណៈបន្ថែមទៀត ចំពោះក្រុមហ៊ុនដ៏ធំទី២ របស់ប្រទេស ក្នុងវិស័យនេះ។ នេះបើយោងតាមលិខិតបទបញ្ជាសម្ងាត់មួយ។

យន្តហោះ Airbus A320 បានហោះហើរដឹកអ្នកដំណើរ រវាងទីក្រុង New Delhi, Bengaluru, Mumbai និង Hyderabad ចាប់ពីថ្ងៃទី២៤ ខែវិច្ឆិកា ដល់ថ្ងៃទី២៥ ខែវិច្ឆិកា ដោយគ្មានវិញ្ញាបនបត្រពិនិត្យភាពមានសុវត្ថិភាពក្នុងការហោះហើរជាកាតព្វកិច្ច ជាលិខិតអនុញ្ញាតដ៏សំខាន់ដែលចេញជារៀងរាល់ឆ្នាំដោយនិយតករ បន្ទាប់ពីយន្តហោះឆ្លងកាត់ការត្រួតពិនិត្យសុវត្ថិភាព និងការអនុលោមតាមច្បាប់។

ការស៊ើបអង្កេតផ្ទៃក្នុងផ្ទាល់ខ្លួនរបស់ក្រុមហ៊ុនអាកាសចរណ៍ Air India ជុំវិញឧប្បត្តិហេតុនេះ ដែលសារព័ត៌មាន Reuters បានរាយការណ៍កាលពីខែធ្នូឆ្នាំមុន បានរកឃើញ «ការខកខានជាប្រព័ន្ធ» ដោយក្រុមហ៊ុនអាកាសចរណ៍នេះ ដែលក៏បានទទួលស្គាល់ផងដែរថា មានតម្រូវការបន្ទាន់ ក្នុងការកែលម្អឲ្យបានឆាប់រហ័ស ក្នុងការអនុលោមភាពច្បាប់នៅក្នុងវិស័យអាកាសចរណ៍។

បទបញ្ជាពិន័យសម្ងាត់ដែលចេញដោយអាជ្ញាធរឥណ្ឌា កាលពីថ្ងៃទី៥ ខែកុម្ភៈ ទៅកាន់នាយកប្រតិបត្តិក្រុមហ៊ុនអាកាសចេណ៍ Air India លោក Campbell Wilson បានរៀបរាប់ថា ឧប្បត្តិហេតុនេះបាន «ធ្វើឲ្យប៉ះពាល់ដល់ទំនុកចិត្តសាធារណៈបន្ថែមទៀត និងប៉ះពាល់ជាអវិជ្ជមានដល់ការអនុលោមតាមច្បាប់សុវត្ថិភាពរបស់ស្ថាប័ន»។

ក្រុមហ៊ុនអាកាសចរណ៍ Air India មិនបានឆ្លើយតបនោះឡើយ ចំពោះសំណួររបស់សារព័ត៌មាន Reuters ទេ។ ក្រុមហ៊ុនអាកាសចរណ៍នេះត្រូវបានស្នើឲ្យបង់ប្រាក់ចំនួន ១០លានរូពីឥណ្ឌា ឬ ១១០.៣៣៩ដុល្លារ ក្នុងរយៈពេល ៣០ថ្ងៃ៕