មន្ត្រីជាន់ខ្ពស់មួយរូបរបស់អ៊ីរ៉ង់ បានបញ្ជាក់សាជាថ្មីនៅថ្ងៃសុក្រ (១៣ កុម្ភៈ) ថា កម្មវិធីមីស៊ីលរបស់ទីក្រុងតេអេរ៉ង់ នៅតែជា «បន្ទាត់ក្រហម» ដែលមិនអាចចរចាបាននោះទេ ខណៈសហរដ្ឋអាមេរិក បានបញ្ជាឱ្យបញ្ជូននាវាផ្ទុកយន្តហោះគ្រឿងទីពីរទៅកាន់តំបន់មជ្ឈិមបូព៌ា ស្របពេលកិច្ចខិតខំប្រឹងប្រែងផ្នែកការទូតហាក់ដូចជាជាប់គាំង។

លោក Ali Shamkhani ទីប្រឹក្សានយោបាយជាន់ខ្ពស់របស់មេដឹកនាំកំពូលអ៊ីរ៉ង់ លោក Ali Khamenei បាននិយាយក្នុងបទសម្ភាសន៍ជាមួយសារព័ត៌មាន Al Jazeera របស់កាតាថា អ៊ីរ៉ង់នឹងឆ្លើយតប «យ៉ាងដាច់ណាត់ និងសមស្រប» ចំពោះសកម្មភាពយោធាណាមួយ។

លោកបាននិយាយថា «អំណាចមីស៊ីលរបស់អ៊ីរ៉ង់ ស្ថិតក្នុងបន្ទាត់ក្រហមរបស់ខ្លួន ហើយមិនអាចចរចាបានទេ» ដោយបន្ថែមថា យោធានៅតែប្រុងប្រយ័ត្នខ្ពស់ និងព្រមានថា តម្លៃតបស្នងនៃ «ការគណនាខុស» ណាមួយដោយមហាអំណាចខាងក្រៅ នឹងខ្ពស់ខ្លាំងណាស់។ យ៉ាងណាក៏ដោយ លោកបាននិយាយថា កិច្ចចរចារវាងទីក្រុងតេអេរ៉ង់ និងទីក្រុងវ៉ាស៊ីនតោន អាចជំរុញនិងការពារផលប្រយោជន៍ទៅវិញទៅមក ប្រសិនបើកិច្ចពិភាក្សាទាំងនោះមានឫសគល់លើភាពប្រាកដនិយម និងជៀសវាងការទាមទារហួសហេតុ។

ក្រោយមកនៅថ្ងៃដដែលនោះ ប្រធានាធិបតីអាមេរិក លោក Donald Trump បាននិយាយថា នាវាផ្ទុកយន្តហោះអាមេរិក ឈ្មោះ USS Gerald R. Ford ដែលជានាវាផ្ទុកយន្តហោះធំជាងគេបំផុតរបស់ពិភពលោក ទទួលបានបញ្ជាឱ្យធ្វើដំណើរទៅចូលរួមជាមួយនាវាផ្ទុកយន្តហោះ USS Abraham Lincoln និងនាវាពិឃាតមីស៊ីលប្រើប្រព័ន្ធទូរបញ្ជាចំនួន ៣គ្រឿង ដែលត្រូវបានដាក់ពង្រាយរួចទៅហើយនៅក្នុងតំបន់មជ្ឈិមបូព៌ា៕