ទីភ្នាក់ងារជនភៀសខ្លួនរបស់អង្គការសហប្រជាជាតិ UNHCR បាននិយាយកាលពីថ្ងៃសុក្រ (១៣ កុម្ភៈ) ថា ការវិលត្រឡប់របស់ជនជាតិអាហ្វហ្គានីស្ថាន រាប់លាននាក់ ពីប្រទេសជិតខាងប៉ាគីស្ថាន និងអ៊ីរ៉ង់ កំពុងតែរុញច្រានអាហ្វហ្គានីស្ថាន ឱ្យខិតទៅជិតមាត់ជ្រោះនៃវិបត្តិដ៏អាក្រក់ ដោយពិពណ៌នាអំពីទំហំនៃការវិលត្រឡប់នេះថា មិនធ្លាប់មានពីមុនមកនោះទេ។

ថ្លែងក្នុងសន្និសីទសារព័ត៌មានអនឡាញមួយរបស់អង្គការសហប្រជាជាតិនៅទីក្រុងហ្សឺណែវ លោក Arafat Jamal តំណាង UNHCR ប្រចាំអាហ្វហ្គានីស្ថាន បាននិយាយថា មនុស្សសរុបចំនួន ៥,៤លាននាក់ បានវិលត្រឡប់ទៅអាហ្វហ្គានីស្ថានវិញ ចាប់តាំងពីខែតុលា ឆ្នាំ២០២៣ ភាគច្រើនមកពីប្រទេសជិតខាងទាំងពីរ។ លោកបន្តថា «នេះជាទិន្នន័យដ៏ធំសម្បើម ហើយល្បឿន និងទំហំនៃការវិលត្រឡប់មកវិញទាំងនេះ បានរុញអាហ្វហ្គានីស្ថានឱ្យកាន់តែជិតមាត់ជ្រោះ»។

ប៉ាគីស្ថាន បានបើកការបង្ក្រាបយ៉ាងទូលំទូលាយនៅក្នុងខែតុលា ឆ្នាំ២០២៣ ដើម្បីបណ្តេញជនអន្តោប្រវេសន៍ដែលគ្មានឯកសារ ដោយជំរុញអ្នកដែលរស់នៅក្នុងប្រទេសរបស់ខ្លួន ឱ្យចាកចេញដោយខ្លួនឯង ដើម្បីជៀសវាងការចាប់ខ្លួន និងការនិរទេសដោយបង្ខំ។ ចំណែកអ៊ីរ៉ង់វិញក៏បានចាប់ផ្តើមបង្ក្រាបលើជនអន្តោប្រវេសន៍ក្នុងពេលតែមួយផងដែរ។

ចាប់តាំងពីពេលនោះមក ប្រជាជនរាប់លាននាក់ បានហូរចូលព្រំដែនចូលទៅអាហ្វហ្គានីស្ថាន។ លោក Jamal បាននិយាយថា កាលពីឆ្នាំ២០២៥ តែមួយប៉ុណ្ណោះ មនុស្សចំនួន ២,៩ លាននាក់ បានវិលត្រឡប់ទៅអាហ្វហ្គានីស្ថានវិញ ដោយកត់សម្គាល់ថានេះជា «ចំនួននៃការវិលត្រឡប់មកប្រទេសវិញដ៏ច្រើនបំផុតដែលមិនធ្លាប់បានឃើញនោះទេនៅក្នុងប្រទេសណាមួយ»៕