ប្រធានាធិបតីអ៊ុយក្រែន លោក Volodymyr Zelenskyy បានសម្តែងក្តីសង្ឃឹមកាលពីថ្ងៃសៅរ៍១៤ កុម្ភៈ ថា ការចរចាសន្តិភាពដែលសម្របសម្រួលដោយសហរដ្ឋអាមេរិកក្នុងទីក្រុងហ្សឺណែវនៅសប្តាហ៍ក្រោយនឹងមានខ្លឹមសារដែលមានសារៈសំខាន់ ប៉ុន្តែលោកបាននិយាយថា អ៊ុយក្រែនត្រូវបានស្នើសុំឱ្យធ្វើសម្បទាន "ញឹកញាប់ពេក"។  

លោកក៏បានចោទប្រកាន់ទីក្រុងមូស្គូផងដែរថា កំពុងស្វែងរកការពន្យារពេលការសម្រេចចិត្តដោយការផ្លាស់ប្តូរអ្នកចរចាឈានមុខរបស់ខ្លួន។

គណៈប្រតិភូអ៊ុយក្រែន រុស្ស៊ី និងអាមេរិក គ្រោងនឹងជួបគ្នានៅទីក្រុងមាត់បឹងរបស់ប្រទេសស្វីសនៅថ្ងៃអង្គារ និងថ្ងៃពុធ សប្ដាហ៍ក្រោយ ខណៈប្រធានាធិបតីអាមេរិក លោក Donald Trump កំពុងស្វែងរកការជំរុញកិច្ចព្រមព្រៀងមួយដើម្បីបញ្ចប់សង្គ្រាមដ៏ធំបំផុតរបស់អឺរ៉ុបចាប់តាំងពីឆ្នាំ ១៩៤៥ មក។

លោក Zelenskyy បានថ្លែងក្នុងសុន្ទរកថាមួយនៅឯសន្និសីទសន្តិសុខប្រចាំឆ្នាំក្នុងទីក្រុង Munich ថា ពួកលោកពិតជាសង្ឃឹមថា កិច្ចប្រជុំត្រីភាគីនៅសប្តាហ៍ក្រោយនឹងមានទម្ងន់ មានខ្លឹមសារ និងមានប្រយោជន៍សម្រាប់ពួកលោកទាំងអស់គ្នា ប៉ុន្តែតាមពិតទៅ ពេលខ្លះមានអារម្មណ៍ថាភាគីទាំងពីរនិយាយមិនចូលគ្នាទាល់តែសោះ។ 

រុស្ស៊ី ដែលបានឈ្លានពានប្រទេសជិតខាងរបស់ខ្លួន គឺអ៊ុយក្រែនកាលពីខែកុម្ភៈ ឆ្នាំ២០២២ បានចូលរួមក្នុងការចរចាពីរជុំថ្មីៗនេះ ដែលសម្របសម្រួលដោយទីក្រុងវ៉ាស៊ីនតោន នៅទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម ដែលត្រូវបានភាគីទាំងពីរពណ៌នាថាមានលក្ខណៈស្ថាបនា ប៉ុន្តែពុំសម្រេចបាននូវរបកគំហើញធំដុំណាមួយឡើយទេ៕