ប្រមុខការទូតជាន់ខ្ពស់របស់ចិនលោក វ៉ាង យី (Wang Yi )បានប្រាប់អធិការបតីអាល្លឺម៉ង់លោក ហ្វ្រីឌ្រីច មឺស (Friedrich Merz) ថា ទីក្រុងប៉េកាំងសង្ឃឹមថានឹងនាំយកទំនាក់ទំនងទ្វេភាគីទៅកាន់    «កម្រិតថ្មី» ខណៈលោកទាំងពីរបានជួបគ្នានៅខាងក្រៅសន្និសីទសន្តិសុខទីក្រុងមុយនិច (Munich) កាលពីថ្ងៃសៅរ៍ ១៤ កុម្ភៈ។

លោក វ៉ាង បានព្យាយាមបង្ហាញថា ទីក្រុងប៉េកាំង ជាដៃគូដែលអាចទុកចិត្តបាន និងកាន់តែមានស្ថិរភាពរបស់សហភាពអឺរ៉ុប ខណៈប្លុកនេះស្វែងរកការកាត់បន្ថយការពឹងផ្អែករបស់ខ្លួនលើទាំងប្រទេសចិន និងសហរដ្ឋអាមេរិក ដែលមិនអាចទាយទុកជាមុនបាន។

យោងតាមការអានពីក្រសួងការបរទេសរបស់ទីក្រុងប៉េកាំង ប្រមុខការទូតចិន បានប្រាប់លោក មឺស ថា ចិនសង្ឃឹមថានឹងធ្វើការជាមួយប្រទេសអាល្លឺម៉ង់ដើម្បីនាំយក «ភាពជាដៃគូយុទ្ធសាស្ត្រគ្រប់ជ្រុងជ្រោយទៅកាន់កម្រិតថ្មី» ។

លោក វ៉ាង បានបន្ថែមថា ដោយមានការគាំទ្រពីទីក្រុងប៊ែរឡាំង ទីក្រុងប៉េកាំងក៏ចង់ «ត្រៀមខ្លួនសម្រាប់ដំណាក់កាលបន្ទាប់នៃការផ្លាស់ប្តូរកម្រិតខ្ពស់» ផងដែរ។

ទំនាក់ទំនងសេដ្ឋកិច្ចស៊ីសម្រៅរវាងប្រទេសទាំងពីរបានរង្គោះរង្គើក្នុងរយៈពេលប៉ុន្មានឆ្នាំថ្មីៗនេះលើបញ្ហាជាច្រើនចាប់ពីការអះអាងអំពីការអនុវត្តពាណិជ្ជកម្មមិនយុត្តិធម៌រហូតដល់នយោបាយគាំពារនិយម។

លោក មឺស ត្រូវបានគេរាយការណ៍ថាកំពុងត្រៀមធ្វើដំណើរទស្សនកិច្ចលើកដំបូងរបស់លោកទៅកាន់ប្រទេសចិននៅខែនេះ ដោយផ្ដោតលើបញ្ហាចម្បងមួយ គឺការផ្សាភ្ជាប់ទំនាក់ទំនងពាណិជ្ជកម្មដែលកំពុងវិវត្ត៕