រដ្ឋមន្ត្រីក្រសួងការពារជាតិអង់គ្លេស លោក John Healey បាននិយាយថា ប្រទេសរុស្ស៊ី កំពុងពឹងផ្អែកកាន់តែខ្លាំងឡើងលើយុទ្ធជនបរទេស ដើម្បីប្រយុទ្ធនៅក្នុងសង្គ្រាមលើអ៊ុយក្រែន ខណៈដែលកងកម្លាំងរបស់ខ្លួន ទទួលរងការខាតបង់ច្រើនជាងអ្វីដែលពួកគេអាចជំនួសបាន។

លោក Healey បានប្រាប់សារព័ត៌មាន Bloomberg នៅខាងក្រៅសន្និសីទសន្តិសុខទីក្រុង Munich កាលពីចុងសប្ដាហ៍កន្លងទៅថា រដ្ឋមន្ត្រីក្រសួងការពារជាតិអ៊ុយក្រែន លោក Mykhailo Fedorov បានប្រាប់សមភាគីអឺរ៉ុបថា ចំនួនអ្នកស្លាប់និងរបួសរបស់រុស្ស៊ី នៅក្នុងសមរភូមិអ៊ុយក្រែន គឺច្រើនជាងតួលេខកងទ័ពដែលវិមានក្រឹមឡាំង អាចជ្រើសរើសមកបំពេញវិញបាន ក្នុងរយៈពេលពីរខែចុងក្រោយនេះ។

លោក Healey និយាយថា រឿងនោះបានបង្ខំឱ្យកងកម្លាំងយោធារុស្ស៊ី ពឹងផ្អែកខ្លាំងលើយុទ្ធជនបរទេសរាប់ពាន់នាក់ រួមទាំងទាហានដែលជ្រើសរើសថ្មីមកពីឥណ្ឌា ប៉ាគីស្ថាន នេប៉ាល់ គុយបា នីហ្សេរីយ៉ា និងសេណេហ្គាល់ ផងដែរ។ ប្រមុខការជាតិអង់គ្លេសរូបនេះបន្តថា យុទ្ធជនបរទេសទាំងនោះ «ជារឿយៗត្រូវបានជ្រើសរើសក្រោមលេសមិនពិត និងត្រូវបានបង្ខំឱ្យបម្រើទ័ពក្រោមសម្ពាធ ដោយមិនដឹងខ្លួនថា ពួកគេត្រូវបានបញ្ជូនឱ្យទៅស្លាប់ជំនួស ក្នុងសមរភូមិជួរមុខនៅអ៊ុយក្រែននោះទេ»។

យោធារុស្ស៊ី និងអ៊ុយក្រែន ផ្ដោតការប្រយុទ្ធភាគច្រើនក្នុងសមរភូជួរមុខប្រវែង ១.២០០ គីឡូម៉ែត្រ។ យោងតាមការវាយតម្លៃរបស់ក្រុមមន្ត្រីលោកខាងលិចបានឱ្យដឹងថា រុស្ស៊ីទំនងជាបានបាត់បង់ទាហាន ៤១៥.០០០នាក់ ដែលរាប់បញ្ចូលទាំងអ្នកស្លាប់និងអ្នករបួស ក្នុងឆ្នាំ២០២៥កន្លងទៅ ដែលជាការធ្លាក់ចុះបន្តិចបន្តួចពីតួលេខ ៤៣០.០០០ នាក់ក្នុងឆ្នាំ២០២៤ ហើយការខាតបង់សរុបទាំងអស់របស់រុស្ស៊ី មានចំនួនជាង ១,២ លាននាក់ ក្នុងអំឡុងពេលសង្គ្រាមជិត ៤ឆ្នាំមកនេះ៕