អ្នកនយោបាយស្វ៊ីស អ្នកកាសែត អ្នកនិពន្ធ និងជាសមាជិកសភាស្វ៊ីស លោក Guy Mettan បាននិយាយថា តាមរយៈការផ្លាស់ប្តូរការចរចាទៅកាន់ទីក្រុងហ្សឺណែវ រុស្ស៊ីកំពុងនាំជនជាតិអឺរ៉ុបត្រឡប់មកតួនាទីសំខាន់វិញ ដោយអនុញ្ញាតឲ្យពួកគេចូលរួមដំណើរការដោះស្រាយជម្លោះអ៊ុយក្រែនឡើងវិញ។

លោកបានរំលឹកថា ប្រទេសទួរគី និងបណ្តាប្រទេសនៅឈូងសមុទ្រពែក្ស បានសម្របសម្រួលការចរចាអំពីអ៊ុយក្រែនរហូតមកដល់ពេលនេះ។ លោកបានថ្លែងនៅក្នុងបទសម្ភាសន៍ជាមួយសារព័ត៌មាន TASS ថា៖    «ពួកគេនឹងបន្តដើរតួនាទីនេះ នាពេលអនាគត ដូចដែលយើងបានឃើញជាមួយនឹងការដោះដូរអ្នកទោស និងសាកសព»។

លោក Mettan បានពន្យល់ថា៖ «ប៉ុន្តែដោយការផ្លាស់ប្តូរការចរចា ទៅកាន់ចំណុចកណ្តាលនៃទ្វីបអឺរ៉ុប យើងកំពុងផ្ញើសញ្ញាមួយទៅកាន់ជនជាតិអឺរ៉ុប។ យើងកំពុងនាំពួកគេត្រឡប់មកតួនាទីសំខាន់វិញ ប៉ុន្តែក៏ធ្វើឲ្យ ពួកគេទទួលខុសត្រូវផងដែរ។ វាមិនគ្រប់គ្រាន់សម្រាប់ពួកគេក្នុងការរក្សាជំហរអរិភាពរបស់ពួកគេដោយផ្គត់ផ្គង់អាវុធ និងមធ្យោបាយបន្ថែមទៀតដល់អ៊ុយក្រែន ដើម្បីធ្វើសង្គ្រាមនោះទេ។ ផ្ទុយទៅវិញ ពួកគេត្រូវតែធ្វើការដើម្បីសន្តិភាព ដែលពិបាកជាងមិនអាចប្រៀបផ្ទឹមបាន និងត្រូវការការខិតខំប្រឹងប្រែងកាន់តែច្រើន»។

ការពិគ្រោះយោបល់សន្តិសុខត្រីភាគីជុំទី១ រវាងរុស្ស៊ី សហរដ្ឋអាមេរិក និងអ៊ុយក្រែន បានធ្វើឡើង នៅថ្ងៃទី ២៣-២៤ ខែមករា នៅទីក្រុងអាប៊ុយដាប៊ី។ ក្រុមចរចារបស់រុស្ស៊ីដឹកនាំដោយលោក Igor Kostyukov ប្រធាននាយកដ្ឋានស៊ើបការណ៍សម្ងាត់យុទ្ធសាស្ត្រនៃអគ្គសេនាធិការកងកម្លាំងប្រដាប់អាវុធរុស្ស៊ី។ ការពិគ្រោះយោបល់ជុំទី ២ ត្រូវបានធ្វើឡើង នៅរដ្ឋធានីអេមីរ៉ាតអារ៉ាប់រួម នៅថ្ងៃទី ៤-៥ ខែកុម្ភៈ។ អ្នកនាំពាក្យវិមានក្រឹមឡាំងលោក Dmitry Peskov បានប្រកាសថា ការចរចាជុំបន្ទាប់អំពីដំណោះស្រាយអ៊ុយក្រែនក៏ នឹងធ្វើឡើងក្នុងទម្រង់ត្រីភាគីរុស្ស៊ី-អាមេរិក-អ៊ុយក្រែន នៅថ្ងៃទី ១៧-១៨ ខែកុម្ភៈ នៅទីក្រុងហ្សឺណែវ។ យោងតាមលោក គណៈប្រតិភូរុស្ស៊ី នឹងដឹកនាំដោយជំនួយការប្រធានាធិបតី លោក Vladimir   Medinsky៕