ដោយមានការយកចិត្តទុកដាក់ខ្ពស់ពីសំណាក់រាជរដ្ឋាភិបាល ចំពោះសុខុមាលភាពប្រជាពលរដ្ឋ ក្រុម​ការងាររាជរដ្ឋាភិបាលចុះមូលដ្ឋានខេត្តកំពត សហការជាមួយមន្ទីរពេទ្យជាដៃគូប្រទេសបារាំង (AMH) និងសមាគមបេសកកម្មមនុស្សធម៌នៅកម្ពុជា បានរៀបចំកម្មវិធីពិនិត្យ និង​ព្យាបាល​ជំងឺ​ទូទៅ​ដោយ​ឥតគិតថ្លៃ ជូនប្រជាពលរដ្ឋស្រុកឈូក រយៈពេល ២ថ្ងៃ។

កម្មវិធីនេះប្រារព្ធឡើងនៅព្រឹកថ្ងៃទី១៦ ខែកុម្ភៈ ឆ្នាំ២០២៦ ក្នុងបរិវេណវត្តពោធិសត្ថារាម (វ​ត្ត​ដី​ក្រហម​) ភូមិព្រេច ឃុំបឹងនិមល ស្រុកឈូក ខេត្តកំពត ក្រោមអធិបតីភាពឯកឧត្តម យ៉ា សាដេត ទី​ប្រឹក្សាក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួង។

ថ្លែងក្នុងឱកាសនោះ ឯកឧត្តម យ៉ា សាដេត បានលើកឡើងថា ក្រោម​ការដឹកនាំ​របស់​សម្តេច​ធិបតី ​ហ៊ុន ម៉ាណែត នាយករដ្ឋមន្ត្រី រាជរដ្ឋាភិបាលបានដាក់ចេញគោលនយោបាយ និង​ណែ​នាំ​ឲ្យ​អាជ្ញាធរ​គ្រប់​លំដាប់ថ្នាក់ យកចិត្តទុកដាក់ដល់សុខទុក្ខ និងសុខុមាលភាព​ប្រជាព​លរដ្ឋ​ជា​ចម្បង​។ ក្នុង​នោះ ប្រធានក្រុមការងារចុះមូលដ្ឋានខេត្តកំពត ឯកឧត្តម សាយ សំអាល់ ឧប​នាយក​រដ្ឋមន្ត្រី តែងតែចុះសាកសួរ និងដោះស្រាយបញ្ហាប្រឈមជូនប្រជាពលរដ្ឋដោយផ្ទាល់។

ឯកឧត្តមបានបញ្ជាក់ថា ក្រុមគ្រូពេទ្យស្ម័គ្រចិត្តពីប្រទេសបារាំង តែងចុះមកពិនិត្យ និង​ព្យាបាល​ជំងឺ​ដោយ​ឥតគិតថ្លៃជារៀងរាល់ឆ្នាំ នៅខេត្តកំពត កែប និងព្រះសីហនុ ដែលជាការ​រួម​ចំណែក​ដ៏​មាន​តម្លៃ​ក្នុងការលើកកម្ពស់សុខភាពប្រជាពលរដ្ឋ។

ក្នុងឱកាសនោះ លោក សៅ មឿន អភិបាលស្រុកឈូក បាន​ថ្លែង​អំណរ​គុណ​ដល់​ក្រុម​គ្រូពេ​ទ្យ​ស្ម័គ្រ​ចិត្ត និងក្រុមការងាររាជរដ្ឋាភិបាល ដែលបានរៀបចំកម្មវិធីមនុស្សធម៌ដ៏មានសារៈសំខាន់នេះ ដើម្បី​ជួយសម្រួលបន្ទុកចំណាយ និងលើកកម្ពស់សុខុមាលភាពប្រជាពលរដ្ឋនៅមូលដ្ឋាន៕