នៅទូទាំងតំបន់អាស៊ី ទីក្រុងនានាបានបង្អួតសម្រស់ដោយការតាំងភ្លើងពណ៌យ៉ាងភ្លឺត្រចះត្រចង់ និងសំឡេងពោពេញដោយភាពអ៊ូអរ ខណៈសហគមន៍នានាបានស្វាគមន៍ឆ្នាំថ្មីឆ្នាំមមីឬសេះ២០២៦ ជាមួយការសម្តែងសិល្បៈដ៏អស្ចារ្យយ៉ាងរស់រវើក និងប្រពៃណីដ៏អស់ពីចិត្ត ពិសេសការឡកម៉ុងសាយ។

ក្រៅពីព្រឹត្តិការណ៍សិល្បៈរបស់ទូរទស្សន៍រដ្ឋចិនដ៏ល្បីល្បាញ សហគមន៍នានាទូទាំងប្រទេសចិន និងប្រជាជនចិននៅក្រៅប្រទេសបានរៀបចំពិធីបុណ្យចង្កៀងគោម និងពិធីតាំងបង្ហាញអំពូលភ្លើងទ្រង់ទ្រាយធំ ដើម្បីអបអរសាទរឆ្នាំថ្មី ដែលចូលមកដល់នៅថ្ងៃ១៧កុម្ភនេះ ដោយបានកែប្រែសម្រស់នៅតាមដងផ្លូវនានាក្នុងបណ្ដាទីក្រុង និងទីលានសាធារណៈទៅជាទីកន្លែងភ្លឺចែងចាំងនៃភ្លើងពណ៌ចម្រុះ និងពិធីបុណ្យ។

នៅក្នុងសារឆ្នាំថ្មី ប្រធានាធិបតីចិនលោក Xi Jinping បានទទួលស្គាល់វឌ្ឍនភាពជាលំដាប់របស់ប្រទេសចិននៅទូទាំងវិស័យជាច្រើន រួមទាំងអភិបាលកិច្ច គំនិតផ្តួចផ្តើមវប្បធម៌ ការអភិរក្សបរិស្ថាន និងការពារជាតិ និងជូនពរឆ្នាំថ្មីដល់ប្រជាជនចិនទូទាំងប្រទេស។

នៅប្រទេសសិង្ហបុរី ក៏ដូចជានៅក្នុងប្រទេសដូចជាហ្វីលីពីន ឥណ្ឌូនេស៊ី និងម៉ាឡេស៊ី សហគមន៍ក្នុងតំបន់បានតុបតែងដងផ្លូវសម្រាប់ពិធីបុណ្យចូលឆ្នាំថ្មីប្រពៃណីចិនយ៉ាងស្រស់ស្អាត និងមានការរៀបចំពិធីបុណ្យចង្កៀងគោម ព្រមទាំងការសម្តែងវប្បធម៌ដើម្បីអបអរសាទរបុណ្យចូលឆ្នាំថ្មី។

នៅកូរ៉េខាងត្បូង មនុស្សម្នាបានចាប់ផ្តើមធ្វើដំណើរទៅកាន់ស្រុកកំណើតសម្រាប់ថ្ងៃឈប់សម្រាកបុណ្យចូលឆ្នាំថ្មី ដែលមានរយៈពេលរហូតដល់ថ្ងៃទី១៨ ខែកុម្ភៈ។ ការព្យាករណ៍អាកាសធាតុនៅឆ្នាំនេះគឺអំណោយផលសម្រាប់ការធ្វើដំណើរកម្សាន្ត និងសកម្មភាពទេសចរណ៍។ទោះបីជាប្រទេសជប៉ុនបានបញ្ឈប់ការប្រារព្ធពិធីបុណ្យចូលឆ្នាំថ្មីជាផ្លូវការនៅឆ្នាំ ១៨៧៣ ក៏ដោយ តំបន់មួយចំនួនដែលមានសហគមន៍ចិនធំៗនៅតែបន្តប្រារព្ធពិធីបុណ្យចូលឆ្នាំថ្មីប្រពៃណីដដែល។មិនត្រឹមតែនៅតាមប្រទេសនៅអាស៊ីទេ សូម្បីប្រទេសជាច្រើនទៀតលើពិភពលោក ក៏តែងប្រារព្ធពិធីបុណ្យចូលឆ្នាំថ្មីប្រពៃណីចិននេះដែរ៕