កងកម្លាំងប្រដាប់អាវុធរបស់ប្រទេសកាណាដា បានចាប់ផ្តើមធ្វើសមយុទ្ធជាបន្តបន្ទាប់នៅតំបន់អាកទិករបស់ខ្លួន ដោយប្រឈមទៅនឹងអាកាសធាតុត្រជាក់ខ្លាំង ជាផ្នែកមួយនៃប្រតិបត្តិការត្រៀមការពារនៅក្នុងតំបន់។

សមយុទ្ធ ដែលមានឈ្មោះថា «ប្រតិបត្តិការ Nanook» មានគោលបំណងបង្កើនសមត្ថភាពរបស់កងទ័ពកាណាដា ក្នុងការធ្វើសកម្មភាពនៅតំបន់អាកទិក។ កាលពីថ្ងៃអាទិត្យ ទី១៥ ខែកុម្ភៈ ទាហានបានស្ថិតនៅក្នុងតំបន់ Yellowknife ដែនដីភាគពាយ័ព្យ ជាកន្លែងដែលសីតុណ្ហភាពធ្លាក់ចុះត្រជាក់ខ្លាំងដល់ក្រោម -៣០អង្សាសេ។

សមយុទ្ធទាំងនេះ កំពុងធ្វើឡើងដោយមានការសម្របសម្រួលជាមួយសហគមន៍ជនជាតិដើមភាគតិចក្នុងតំបន់ និងដៃគូដែនដីផ្សេងទៀត ដោយចែករំលែកជំនាញនៅពេលកំពុងធ្វើប្រតិបត្តិការក្នុងតំបន់។

«ប្រតិបត្តិការ Nanook» ធ្វើឡើងក្នុងពេលមានភាពតានតឹងកាន់តែខ្លាំងឡើងនៅតំបន់អាកទិក បន្ទាប់ពីមានការថ្លែងលើកឡើងពីប្រធានាធិបតីសហរដ្ឋអាមេរិក លោក Donald Trump ក្នុងការយកដែនដី Greenland មកគ្រប់គ្រង។

កាលពីពេលថ្មីៗនេះ ប្រទេសកាណាដា បានបើកស្ថានកុងស៊ុលមួយនៅទីក្រុង Nuuk ដែនដីGreenland ហើយនាយករដ្ឋមន្ត្រី លោក Mark Carney បាននិយាយថា លោកមានបំណងកសាងទំនាក់ទំនងការពារជាតិជាមួយប្រទេសអឺរ៉ុបភាគខាងជើង នៅតំបន់អាកទិក។