អ្នកនាំពាក្យអង្គការសហប្រជាជាតិ បាននិយាយកាលពីថ្ងៃចន្ទ (១៦ កុម្ភៈ) ថា លោក Antonio Guterres អគ្គលេខាធិការអង្គការសហប្រជាជាតិ នៅតែបន្តតាមដានស្ថានកាណ៍នៅក្នុងប្រទេសគុយបា និងជំរុញឱ្យមានកិច្ចសន្ទនារវាងភាគីពាក់ព័ន្ធ ខណៈដែលប្រទេសកោះនេះកំពុងជួបការលំបាកខ្លាំង ជាមួយនឹងការខ្វះខាតប្រេងឥន្ធនៈកាន់តែអាក្រក់ទៅៗ។

អ្នកនាំពាក្យអង្គការសហប្រជាជាតិ លោក Stephane Dujarric បានលើកឡើងថា «លោកអគ្គលេខាធិការបានតាមដានស្ថានការណ៍នៅក្នុងប្រទេសគុយបា យ៉ាងដិតដល់បំផុត ហើយលោកមានការព្រួយបារម្ភយ៉ាងខ្លាំងអំពីស្ថានភាពដែលកំពុងកាន់តែអាក្រក់ទៅៗនេះ ខណៈដែលតម្រូវការប្រេងនៅតែមិនទាន់ត្រូវបានបំពេញ»។

ដោយរំលឹកឡើងវិញនូវការអំពាវនាវម្តងហើយម្តងទៀតរបស់មហាសន្និបាតអង្គការសហប្រជាជាតិឱ្យបញ្ចប់ «ការហាមឃាត់ដែលដាក់ដោយសហរដ្ឋអាមេរិកលើប្រទេសគុយបា» លោក Dujarric បាននិយាយថា លោក Guterres «ចង់ឃើញគ្រប់ភាគីទាំងអស់បន្តការសន្ទនា និងការគោរពច្បាប់អន្តរជាតិជាថ្មីម្តងទៀត»។

វិបត្តិប្រេងឥន្ធនៈនៅគុយបា កាន់តែអាក្រក់ទៅៗ បន្ទាប់ពីអាមេរិក កាត់ផ្តាច់ការផ្គត់ផ្គង់ប្រេងពីវ៉េណេស៊ុយអេឡា ជាសម្ព័ន្ធមិត្តដ៏យូរអង្វែងរបស់គុយបា ដែលបានដឹកជញ្ជូនប្រេងរាប់ម៉ឺនបារ៉ែលជារៀងរាល់ថ្ងៃទៅកាន់កោះនេះ។ ការរំខានកាន់តែអាក្រក់ឡើងក្រោមការបង្កើនការបិទខ្ទប់លំហូរប្រេង បន្ទាប់ពីប្រតិបត្តិការរបស់អាមេរិក ដែលបានចាប់ខ្លួនអតីតប្រធានាធិបតីវ៉េណេស៊ុយអេឡា និងការរឹបអូសនាវាដឹកប្រេង ដែលបានបញ្ឈប់ការដឹកជញ្ជូនប្រេងឥន្ធនៈសំខាន់ៗ៕