កាលពីថ្ងៃចន្ទ (១៦ កុម្ភៈ) សមាគម និងក្រុមសិទ្ធិមនុស្សចំនួនជិត ៧០ ក្រុម បានចេញការរិះគន់របស់ពួកគេចំពោះកំណែទម្រង់របស់សហភាពអឺរ៉ុប លើការធ្វើអន្តោប្រវេសន៍ដែលកំពុងស្ថិតក្រោមការពិចារណារបស់សភាអឺរ៉ុប ដោយប្រៀបធៀបវិធានការនេះទៅនឹងគោលនយោបាយរបស់សហរដ្ឋអាមេរិក ក្រោមការដឹកនាំរបស់លោកប្រធានាធិបតី Donald Trump និងអំពាវនាវឱ្យក្រុមមន្ត្រីបោះបង់ចោលសេចក្ដីព្រាងច្បាប់នេះ។

សមាគមជាច្រើន រួមទាំងក្រុមសិទ្ធិមនុស្សអឺរ៉ុប បាននិយាយក្នុងលិខិតមួយថា «ការគំរាមកំហែងនេះគឺជាការពិតនិងភ្លាមៗ» ដោយសម្តែងក្ដីបារម្ភពីការឆ្មក់បង្រ្កាបរបស់នគរបាលលើទីសាធារណៈ និងឯកជន និងការកំណត់ទម្រង់ជាតិសាសន៍។ ពួកគេព្រមានថា៖ វិធានការនេះចង់បង្ខំរដ្ឋជាសមាជិកឱ្យ «តាមរកឱ្យឃើញ» នូវមនុស្សដែលគ្មានឯកសារ ដែលនឹងប្រែក្លាយទីកន្លែងប្រចាំថ្ងៃ និងសេវាសាធារណៈ ទៅជាឧបករណ៍នៃការអនុវត្តច្បាប់អន្តោប្រវេសន៍ តាមបែបទីភ្នាក់ងារ ICE របស់អាមេរិក។

រដ្ឋបាលលោក Trump បានបង្កើនកិច្ចប្រឹងប្រែងដើម្បីនិរទេសជនអន្តោប្រវេសន៍រាប់លាននាក់ដែលគ្មានឯកសារចេញពីសហរដ្ឋអាមេរិក។ ប៉ុន្តែការឆ្មក់ចូលបង្រ្កាប និងឆែកឆេរដោយមន្ត្រីប្រដាប់អាវុធពីអង្គភាពអនុវត្តច្បាប់អន្តោប្រវេសន៍ និងគយ (ICE) និងភ្នាក់ងារផ្សេងទៀត បានបង្កឱ្យមានការតវ៉ានៅក្នុងទីក្រុងនានាទូទាំងប្រទេស ហើយក៏បាននាំឱ្យមានការបង្ក្រាបដោយហិង្សាផ្សេងទៀត។

កាលពីសប្ដាហ៍មុន សមាជិកសភាអឺរ៉ុប បានអនុម័តចំណាត់ការផ្លាស់ប្តូរប្រព័ន្ធសិទ្ធិជ្រកកោនរបស់ប្លុកនេះ ដែលបើកផ្លូវសម្រាប់ការបដិសេធសិទ្ធិជ្រកកោនឆាប់រហ័ស និងលទ្ធភាពនៃការផ្ទេរអ្នកស្វែងរកសិទ្ធិជ្រកកោនទៅប្រទេសដែលពួកគេមានទំនាក់ទំនងតិចតួចឬគ្មានទំនាក់ទំនងសោះ។ ជំហាននេះគូសបញ្ជាក់ពីកំណើននៃគំនិតប្រឆាំងអន្តោប្រវេសន៍ទូទាំងប្លុកអឺរ៉ុប ក្នុងពេលមួយទសវត្សរ៍កន្លងមកនេះ៕