សម្ព័ន្ធអារ៉ាប់ (AL) បាននិយាយកាលពីថ្ងៃចន្ទថា ការសម្រេចចិត្តរបស់អ៊ីស្រាអែលក្នុងការចុះបញ្ជីតំបន់មួយចំនួននៃតំបន់វេសបែង (West Bank)ជា «ទ្រព្យសម្បត្តិរដ្ឋ» គឺជាការរំលោភបំពានយ៉ាងច្បាស់លាស់លើច្បាប់អន្តរជាតិ និងសេចក្តីសម្រេចស្របច្បាប់អន្តរជាតិ។

នៅក្នុងសេចក្តីថ្លែងការណ៍មួយ សម្ព័ន្ធអារ៉ាប់បានថ្កោលទោសចំពោះការសម្រេចរបស់អ៊ីស្រាអែល «ដោយពាក្យសម្តីធ្ងន់ៗ» ដោយនិយាយថា ជំហាននេះ គឺជា «វិធានការឯកតោភាគីដែលគ្មានប្រសិទ្ធភាព» ដែលមានគោលបំណងដាក់ចេញនូវការពិតថ្មីៗជាក់ស្តែង និងបម្រើជាជំហានត្រៀមឆ្ពោះទៅការដាក់បញ្ចូលទឹកដីប៉ាឡេស្ទីន ជាឧបសម្ព័ន្ធរបស់អ៊ីស្រាអែល។ 

សេចក្តីថ្លែងការណ៍បានបន្ថែមថា ការដាក់បញ្ចូលគោលនយោបាយនៃសកម្មភាពតាំងទីលំនៅខុសច្បាប់ ធ្វើឲ្យប៉ះពាល់ដល់លទ្ធភាពនៃការសម្រេចបាននូវសន្តិភាពប្រកបដោយយុត្តិធម៌ និងយូរអង្វែងដោយផ្អែកលើដំណោះស្រាយរដ្ឋពីរ។

សម្ព័ន្ធអារ៉ាប់បានព្រមានថា ការបន្តគោលនយោបាយទាំងនេះ នឹងធ្វើឲ្យភាពតានតឹងកាន់តែធ្ងន់ធ្ងរឡើង និងគំរាមកំហែងដល់សន្តិសុខ និងស្ថិរភាពនៅក្នុងតំបន់ ដែលនាំឲ្យមានអំពើហិង្សា និងអស្ថិរភាពបន្ថែមទៀត ដោយអំពាវនាវឲ្យមានអន្តរាគមន៍ជាបន្ទាន់ពីសហគមន៍អន្តរជាតិ ជាពិសេសក្រុមប្រឹក្សាសន្តិសុខអង្គការសហប្រជាជាតិ។

អ៊ីស្រាអែលកាលពីថ្ងៃអាទិត្យបានអនុម័តផែនការមួយ ដើម្បីចុះបញ្ជីដីធ្លីនៅតំបន់វេសបែង ជា «ទ្រព្យសម្បត្តិរដ្ឋ» ជាចំណាត់ការមួយដែលអាចពង្រឹងការអះអាងទាមទាររបស់អ៊ីស្រាអែល និងសម្រួលដល់ការពង្រីកការតាំងទីលំនៅ។ យោងតាមសេចក្តីថ្លែងការណ៍រួមមួយ ផែនការនេះ ដែលបានដាក់ជូនដោយរដ្ឋ    មន្ត្រីក្រសួងហិរញ្ញវត្ថុ លោក Bezalel Smotrich រដ្ឋមន្ត្រីក្រសួងយុត្តិធម៌ លោក Yariv Levin និងរដ្ឋមន្ត្រីក្រសួងការពារជាតិ លោក Israel Katz ត្រូវបានអនុម័តដោយគណៈរដ្ឋមន្ត្រី៕