ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទ (ទី១៦ ខែកុម្ភៈ ឆ្នាំ២០២៦) ថា លោកនឹងសម្រេចចិត្តឆាប់ៗនេះ ជុំវិញថា តើត្រូវបញ្ជូនអាវុធបន្ថែមទៀតទៅកោះតៃវ៉ាន់ដែរ ឬអត់ បន្ទាប់ពីប្រធានាធិបតីចិន លោក Xi Jinping (ស៊ី ជីនពីង) បានក្រើនរំលឹកលោកកុំឲ្យធ្វើដូច្នេះ។

លោក Trump បាននិយាយថា៖ «ខ្ញុំកំពុងនិយាយជាមួយលោក (លោក ស៊ី) អំពីរឿងនេះ។ យើងមានការសន្ទនាដ៏ល្អជាមួយគ្នា ហើយយើងនឹងធ្វើការសម្រេចចិត្តឆាប់ៗនេះ»។ លោកបានបន្ថែមថា លោកមាន «ទំនាក់ទំនងល្អ» ជាមួយមេដឹកនាំចិន ដែលប្រទេសរបស់លោកអះអាងថា កោះតៃវ៉ាន់ជាទឹកដីរបស់ខ្លួន។

គួរបញ្ជាក់ថា អំឡុងការសន្ទនាតាមទូរសព្ទជាមួយលោក Trump កាលថ្ងៃទី៤ ខែកុម្ភៈ លោក Xi បានអំពាវនាវឲ្យមាន «ការគោរពគ្នាទៅវិញទៅមក» ក្នុងទំនាក់ទំនងជាមួយសហរដ្ឋអាមេរិក ខណៈពេលដែលក្រើនរំលឹកទីក្រុងវ៉ាស៊ីនតោន អំពីការលក់អាវុធទៅឲ្យកោះដែលគ្រប់គ្រងដោយលទ្ធិប្រជាធិបតេយ្យ។ លោក Trump និងលោក Xi ត្រូវបានគ្រោងជួបគ្នានៅទីក្រុងប៉េកាំង ក្នុងខែមេសាខាងមុខ។

ទីក្រុងវ៉ាស៊ីនតោនមិនទទួលស្គាល់កោះតៃវ៉ាន់ជាផ្លូវការទេ ប៉ុន្តែជាអ្នកគាំទ្រយោធាដ៏សំខាន់របស់ដែនដីកោះនេះ បើទោះបីជាសម្លេងផ្ដល់ការគាំទ្រ បានបន្ទន់បន្តិចក្រោមការដឹកនាំរបស់លោក Trump ក៏ដោយ។ ទីក្រុងតៃប៉ិបានឲ្យដឹងថា សហរដ្ឋអាមេរិកបានអនុម័តលក់អាវុធតម្លៃ ១១ពាន់លានដុល្លារដល់កោះតៃវ៉ាន់នៅក្នុងខែធ្នូ។

បើទោះបីជាលោក Trump បានសម្រួលសំឡេងទាបជាងមុន ជុំវិញការគាំទ្រកោះតៃវ៉ាន់ នៅក្នុងអាណត្តិទីពីររបស់លោកក៏ដោយ ក៏បញ្ហានេះនៅតែជាបញ្ហាមួយនៅក្នុងទំនាក់ទំនង រវាងសហរដ្ឋអាមេរិក និងចិន។ កាលពីថ្ងៃសៅរ៍ចុងសប្ដាហ៍កន្លងមក អ្នកការទូតជាន់ខ្ពស់របស់ទីក្រុងប៉េកាំង លោក Wang Yi បានប្រាប់សហរដ្ឋអាមេរិក កុំឲ្យមាន «ការរៀបចំផែនការ» ពាក់ព័ន្ធនឹងកោះតៃវ៉ាន់ ដោយនិយាយថា វាអាចនាំទៅដល់ «ការប្រឈមមុខដាក់គ្នា» ជាមួយប្រទេសចិន៕