ទីភ្នាក់ងារព័ត៌មាន Antara របស់ឥណ្ឌូនេស៊ី រាយការណ៍ថា ឥណ្ឌូនេស៊ីគ្រោងនឹងទទួលបាននាវាដឹកយន្តហោះចម្បាំងលើកដំបូងរបស់ខ្លួនពីប្រទេសអ៊ីតាលី ក្នុងឆ្នាំ ២០២៦នេះ ។

ទីភ្នាក់ងារព័ត៌មាន Antara រាយការណ៍ដោយលើកឡើងសម្តីប្រធានមន្ទីរព័ត៌មាន និងទំនាក់ទំនងសាធារណៈនៃក្រសួងការពារជាតិឥណ្ឌូនេស៊ីលោកឧត្តមសេនីយឯក Rico Ricardo Sirait ថា នាវាដឹកយន្តហោះចម្បាំង Giuseppe Garibaldi នឹងត្រូវបញ្ជូនទៅកាន់ឥណ្ឌូនេស៊ី ដោយរដ្ឋាភិបាលអ៊ីតាលី ក្នុងនាមជាជំនួយឥតសំណង ។

ទីភ្នាក់ងារ Antara រាយការណ៍ថា លោក Sirait និយាយថា នាវាផ្ទុកយន្តហោះចម្បាំង Giuseppe Garibaldi គឺជាជំនួយឥតសំណងពីរដ្ឋាភិបាលអ៊ីតាលី ។ រដ្ឋាភិបាលឥណ្ឌូនេស៊ី នឹងបែងចែកថវិកាសម្រាប់ការកែលម្អ ឬការកែតម្រូវ ដើម្បីបំពេញតម្រូវការប្រតិបត្តិការរបស់កងទ័ពជើងទឹកឥណ្ឌូនេស៊ី ។

លោកបន្តថា កិច្ចចរចា និងដំណើរការរដ្ឋបាលពាក់ព័ន្ធនឹងនាវាដឹកយន្តហោះចម្បាំងនេះ កំពុងធ្វើឡើងរវាងរដ្ឋាភិបាលឥណ្ឌូនេស៊ី និងអ៊ីតាលី ។

នាវា Giuseppe Garibaldi ត្រូវបានផលិតឡើងដោយរោងចក្រផលិតនាវាអ៊ីតាលី Fincantieri ហើយនិងដាក់ឲ្យប្រើប្រាស់កាលពីឆ្នាំ ១៩៨៥ ។ វាបានបម្រើការជាមួយកងទ័ពជើងទឹកអ៊ីតាលីចាប់ពីឆ្នាំ ១៩៨៥ រហូតដល់ឆ្នាំ ២០២៤ ។

លោកឧត្តមនាវីឯក Muhammad Ali គឺជាអគ្គសេនាធិការកងទ័ពជើងទឹកឥណ្ឌូនេស៊ីនិយាយថា នាវាដឹកយន្តហោះចម្បាំងមួយគ្រឿងនេះ ត្រូវបានគេរំពឹងទុកថា នឹងធ្វើដំណើរមកដល់ប្រទេសឥណ្ឌូនេស៊ី មុនថ្ងៃទី ៥ ខែតុលា ខាងមុខនេះ ដែលជាថ្ងៃទិវានៃកងកម្លាំងប្រដាប់អាវុធជាតិឥណ្ឌូនេស៊ី ។

លោកបន្តថា កិច្ចចរចាកំពុងបន្តរវាងក្រសួងការពារជាតិឥណ្ឌូនេស៊ី និងរោងចក្រ Fincantieri ក៏ដូចជាកងទ័ពជើងទឹកអ៊ីតាលី ។

នាវា Giuseppe Garibaldi នឹងរួមចំណែកស្រដៀងគ្នាជាមួយនាវាចម្បាំងថ្មីចំនួន ២របស់កងទ័ពជើងទឹកឥណ្ឌូនេស៊ីគឺនាវា KRI Brawijaya និងនាវា KRI Prabu Siliwangi ដែលត្រូវបានផលិតផងដែរដោយរោងចក្រ Fincantieri ៕