ស្របពេលដែលជនមូស្លីមនៅប្រទេសអាហ្វហ្គានីស្ថាន ចាប់ផ្តើមខែតមអាហាររ៉ាម៉ាដាននៅថ្ងៃពុធនេះ គ្រួសារជាច្រើនពិបាករកបា្រក់ទិញចំណីអាហារមូលដ្ឋាន ស្របពេលតម្លៃហក់ឡើងខ្ពស់ ក្នុងនោះអាហារសំខាន់ៗដូចជា ប្រេងឆា អង្ករ និងម៉្សៅ វាលែងមានលទ្ធភាព សម្រាប់ពលរដ្ឋដែលជួបការលំបាករួចទៅហើយដោយសារភាពក្រីក្រ និងគ្មានការងារធ្វើ ។

អ្នកស្រី Zakia គឺជាពលរដ្ឋមួយរូបរស់នៅក្នុងប្រទេសអាហ្វហ្គានីស្ថាន និយាយថា ពួកយើងគ្មានលទ្ធភាពទិញអង្ករនោះទេ ។ វាមានរយៈពេលជាយូរមកហើយ ចាប់តាំងពីពួកយើងបានទិញវាលើកចុងក្រោយ ។ តម្លៃពិតជាខ្ពស់ខ្លាំងណាស់ ហើយពួកយើងគឺជាអ្នកក្រីក្រ គ្មានអ្វីនោះទេ ។ ពួកយើងគ្មានលទ្ធភាពនោះទេ ។

សេដ្ឋកិច្ចអាហ្វហ្គានីស្ថាន បន្តផុយស្រួយ ជាប់ទណ្ឌកម្ម អត្រាគ្មានការងារធ្វើមានកម្រិតខ្ពស់ និងជំនួយមនុស្សធម៌ថយចុះ ។

ទាំងនេះហើយ ធ្វើឲ្យពលរដ្ឋអាហ្វហ្គានីស្ថានរាប់លាននាក់ រស់នៅក្នុងភាពក្រីក្រ ហើយពឹងផ្អែកខ្លាំងលើជំនួយ ខណៈអសន្តិសុខស្បៀងកាន់តែអាក្រក់ខ្លាំង បង្កឡើងដោយសារថ្លៃចំណីអាហារហក់ឡើងខ្ពស់ គ្រោះរាំងស្ងួត និងធនធានមានដែនកំណត់ ។

សូមបញ្ជាក់ថា អំឡុងពិធីបុណ្យរ៉ាម៉ាដាន ជនមូស្លីមនៅទូទាំងពិភពលោក ត្រូវតមអាហារ មិនអាចទទួលទានអាហារ ផឹកទឹក និងជក់បារីបានឡើយ អំឡុងចន្លោះពេលថ្ងៃរះ និងថ្ងៃលិច ដើម្បីបូជាចំពោះព្រះ ៕