ប្រធានាធិបតីសហរដ្ឋអាមេរិក លោក Donald Trump ដោយផ្លាស់ប្តូរជំហររបស់លោកម្តងទៀត បានព្រមានចក្រភពអង់គ្លេសកាលពីថ្ងៃពុធ១៨កុម្ភៈសប្ដាហ៍នេះ កុំឱ្យ «បោះបង់ចោល» មូលដ្ឋានទ័ពដ៏សំខាន់មួយនៅមហាសមុទ្រឥណ្ឌា ដោយនិយាយថា មូលដ្ឋាននេះនឹងមានសារៈសំខាន់ប្រសិនបើសហរដ្ឋអាមេរិកវាយប្រហារអ៊ីរ៉ង់។ 

កោះ Diego Garcia គឺជាកោះធំបំផុតនៃប្រជុំកោះ Chagos។ កោះនេះត្រូវបានប្រើជាមូលដ្ឋានយោធារួមគ្នារវាងចក្រភពអង់គ្លេស និងសហរដ្ឋអាមេរិកចាប់តាំងពីទសវត្សរ៍ឆ្នាំ១៩៧០ ក្រោយការបណ្ដេញពលរដ្ឋកោះ Chagos ដោយរដ្ឋាភិបាលអង់គ្លេស។កោះ Chagos គឺជាទឹកដីក្រៅប្រទេសរបស់អង់គ្លេស តាមរយៈសន្ធិសញ្ញាមួយដែលនឹងត្រូវផ្ទេរអធិបតេយ្យភាពពីអង់គ្លេសទៅឲ្យប្រទេសម៊ូរីសវិញ ត្រូវបានចុះហត្ថលេខាកាលពីថ្ងៃទី២២ខែឧសភា២០២៥ ដោយផ្ដល់សិទ្ធិឲ្យអង់គ្លេសគ្រប់គ្រង១០០ឆ្នាំ។

លោក Trump ដែលកំពុងពិចារណាវាយប្រហារលើសាធារណរដ្ឋអ៊ីស្លាមអ៊ីរ៉ង់ បានថ្លែងប៉ុន្មានម៉ោងបន្ទាប់ពីក្រសួងការបរទេសបានផ្តល់ការគាំទ្ររបស់អាមេរិកម្តងទៀតចំពោះកិច្ចព្រមព្រៀងរបស់នាយករដ្ឋមន្ត្រីអង់គ្លេស Keir Starmer ដើម្បីប្រគល់កោះ Chagos ទៅឱ្យប្រទេសកោះម៉ូរីសវិញ។

ក្រោមកិច្ចព្រមព្រៀងនេះ ចក្រភពអង់គ្លេសនឹងបង់ប្រាក់ដើម្បីជួលមូលដ្ឋានទ័ពយុទ្ធសាស្ត្ររួមគ្នារវាងសហរដ្ឋអាមេរិក និងចក្រភពអង់គ្លេសនៅកោះ Diego Garcia រយៈពេលមួយសតវត្ស។

លោក Trump បានសរសេរនៅលើបណ្ដាញសង្គម Truth Social របស់លោកថា នាយករដ្ឋមន្ត្រី Starmer មិនគួរបាត់បង់ការគ្រប់គ្រង មិនថាហេតុផលណាមួយលើកោះDiego Garcia ដោយការចូលទៅក្នុងកិច្ចសន្យាជួលដ៏ទន់ខ្សោយ ឬយ៉ាងហោចណាស់ត្រឹម ១០០ ឆ្នាំនោះទេ។

លោកបានសរសេរថា «ដីនេះមិនគួរត្រូវបានដកហូតពីចក្រភពអង់គ្លេសទេ ហើយប្រសិនបើត្រូវបានអនុញ្ញាតឱ្យដកហូត វានឹងក្លាយជាបញ្ហាដល់សម្ព័ន្ធមិត្តដ៏អស្ចារ្យរបស់យើង»៕