មន្ត្រីជាន់ខ្ពស់អាមេរិកមួយរូបបានប្រាប់សារព័ត៌មានរ៉យទ័រ កាលពីថ្ងៃពុធ (១៨ កុម្ភៈ) ថា អ៊ីរ៉ង់ត្រូវបានរំពឹងថា នឹងដាក់សំណើជាលាយលក្ខណ៍អក្សរអំពីរបៀបដោះស្រាយភាពជាប់គាំងរបស់ខ្លួនជាមួយសហរដ្ឋអាមេរិក បន្ទាប់ពីកិច្ចចរចារវាងទីក្រុងវ៉ាស៊ីនតោន និងទីក្រុងតេអេរ៉ង់ នៅទីក្រុងហ្សឺណែវប្រទេសស្វីស កាលពីថ្ងៃអង្គារសប្ដាហ៍នេះ។

មន្ត្រីរូបនេះបាននិយាយថា ទីប្រឹក្សាសន្តិសុខជាតិជាន់ខ្ពស់របស់អាមេរិក បានជួបប្រជុំគ្នានៅក្នុងបន្ទប់គ្រប់គ្រងវិបត្តិរបស់សេតវិមាន កាលពីថ្ងៃពុធ ដើម្បីពិភាក្សាអំពីបញ្ហាអ៊ីរ៉ង់ ហើយនៅក្នុងនោះ ក្រុមមន្រ្តីបានរាយការណ៍ប្រាប់ថា កងកម្លាំងយោធាអាមេរិកទាំងអស់ដែលដាក់ពង្រាយនៅក្នុងតំបន់មជ្ឈិមបូព៌ា គួរតែអាចស្ថិតនៅនឹងទីតាំងរួចរាល់នៅពាក់កណ្តាលខែមីនា។

មន្ត្រីរូបនេះក៏បាននិយាយថា រដ្ឋមន្ត្រីការបរទេសអាមេរិក លោក Marco Rubio នឹងជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅអ៊ីស្រាអែល ដើម្បីពិភាក្សាពីបញ្ហាអ៊ីរ៉ង់ នៅថ្ងៃទី២៨ ខែកុម្ភៈ។ កិច្ចពិភាក្សាដោយប្រយោលកាលពីថ្ងៃអង្គារសប្ដាហ៍នេះ រវាងប្រេសិតអាមេរិក រួមជាមួយរដ្ឋមន្ត្រីការបរទេសអ៊ីរ៉ង់ មានបំណងទប់ស្កាត់វិបត្តិដែលកំពុងកើនឡើងរវាងប្រទេសទាំងពីរ ប៉ុន្តែនៅពុំទាន់មានកិច្ចព្រមព្រៀងផ្លូវការទេ។

មន្ត្រីជាន់ខ្ពស់អាមេរិករូបនេះនិយាយថា អ៊ីរ៉ង់បានយល់ព្រមធ្វើសំណើជាលាយលក្ខណ៍អក្សរអំពីរបៀបដោះស្រាយកង្វល់របស់អាមេរិក ក្នុងអំឡុងកិច្ចចរចានៅទីក្រុងហ្សឺណែវ។ លោកស្រី Karoline Leavitt អ្នកនាំពាក្យសេតវិមាន បានប្រាប់អ្នកយកព័ត៌មានកាលពីថ្ងៃពុធថា វឌ្ឍនភាពមួយចំនួនត្រូវបានធ្វើឡើងនៅទីក្រុងហ្សឺណែវ ប៉ុន្តែ «ភាគីទាំងពីរនៅតែឃ្លាតឆ្ងាយពីគ្នាខ្លាំងលើបញ្ហាមួយចំនួន»៕