បាល់ទាត់៖ ការប្រកួតបាល់ទាត់មហាជនដណ្ដើមពានរង្វាន់ឯកឧត្ដមបណ្ឌិត ហ៊ុន ម៉ាណែត រដូវកាលទី១ ឆ្នាំ២០២២ ដែលផ្ដួចផ្ដើមគំនិតរៀបចំដោយលោក នៅ សារី អគ្គនាយកក្រុមហ៊ុនអាហ្ស៊ី ម៉ះរ៉បើ និងមានការគាំទ្រពីសហព័ន្ធកីឡាបាល់ទាត់កម្ពុជាបានបញ្ចប់ដោយជោគជ័យ ក្រោយដំណើរការប្រកួតជាង ១០ថ្ងៃនៅទីលានភូមិពោធិរោងលើ ឃុំកោងកាង ស្រុកពញាក្រែក ខេត្តត្បូងឃ្មុំ ដោយក្រុម ស.ស.យ.ក ខេត្តកំពង់ចាមបានគ្រងជើងឯក បន្ទាប់ពីយកឈ្នះក្រុមរស្មីសន្តិភាពពង្រក្នុងវគ្គផ្ដាច់ព្រ័ត្រ ១-០។
ពិធីបិទការប្រកួតនេះបានធ្វើឡើងក្រោមវត្តមានឯកឧត្តម ឡា ឡៃ សមាជិកគណៈកម្មាធិការប្រតិបត្តិសហព័ន្ធកីឡាបាល់ទាត់កម្ពុជា និងជាតំណាងឯកឧត្ដមបណ្ឌិត ហ៊ុន ម៉ាណែត និងមានការចូលរួមពីឯកឧត្តម ម៉ូត យូសុះ សមាជិកភាព និងជាតំណាងរាស្ដ្រមណ្ឌលខេត្តត្បូងឃ្មុំ ពិសេសគឺមានប្រជាពលរដ្ឋខ្ទង់ម៉ឺននាក់បានចូលរួមទស្សនា និងគាំទ្រការប្រកួតវគ្គផ្ដាច់ព្រ័ត្រនេះផងដែរ។ លោក នៅ សារី បានថ្លែងប្រាប់អ្នកសារព័ត៌មានក្រោយចប់ការប្រកួតថា ព្រឹត្តិការណ៍បាល់ទាត់មហាជនរដូវកាលនេះរៀបចំឡើងក្រោមពាក្យស្លោក “គាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ដ្រីនាថ្ងៃអនាគត” ដោយមានការចូលរួម ៣២ក្រុម។ តាមរយៈការរៀបចំនេះ លោកចង់ឲ្យប្រជាពលរដ្ឋចូលរួមថែរក្សាសន្ដិភាព ដើម្បីរក្សានូវការអភិវឌ្ឍគ្រប់វិស័យ រួមទាំងវិស័យកីឡាបាល់ទាត់ ដែលផ្ដល់ឱកាសឲ្យយុវជនបានចូលរួមប្រកួតប្រជែងគ្រប់ច្រក់ល្ហក់។ ម្យ៉ាងវិញទៀត ការរៀបចំនេះក៏ដើម្បីជំរុញឲ្យក្រុមបាល់ទាត់មហាជនទូទាំងប្រទេស បានយល់ច្បាស់ពីក្បួនច្បាប់ និងលក្ខខណ្ឌប្រកួតរបស់អន្ដរជាតិ ចៀសវាងការប្រកួតបង្កឲ្យមានអំពើហិង្សានានាផងដែរ។ ដូច្នេះក្រោយចប់ការប្រកួតនេះ លោកសង្ឃឹមថា ក្រុមចូលរួមទាំងអស់នឹងបានយល់ដឹងច្រើនពីច្បាប់ល្បែង ហើយនៅរដូវកាលក្រោយៗនឹងមានក្រុមចូលរួមកាន់តែច្រើន ហើយមានការប្រកួតប្រជែងកាន់តែខ្លាំងថែមទៀត។
គួរបញ្ជាក់ថា ពានរង្វាន់ឯកឧត្តមបណ្ឌិត ហ៊ុន ម៉ាណែត រដូវកាលទី១ បានចាប់ផ្ដើមប្រកួតពីថ្ងៃទី១០ ដល់ថ្ងៃទី២០ ខែមីនា ដោយមាន ៣២ក្រុមចូលរួម និងប្រើរូបមន្ដប្រកួតជម្រុះចាញ់-ធ្លាក់រហូតដល់វគ្គផ្ដាច់ព្រ័ត្រ ដែលក្រុមដោយក្រុម ស.ស.យ.ក ខេត្តកំពង់ចាម បានយកឈ្នះក្រុមរស្មីសន្តិភាពពង្រទាំងលំបាកក្នុងលទ្ធផល ១-០ ដែលធ្វើសម្រេចដោយកីឡាករ ចាន់ថា អាឡាហ្នឹន។ រីឯចំណាត់ថ្នាក់លេខ៣ បានទៅក្រុមសាលារ៉ះម៉ាស់ ក្រោយយកឈ្នះក្រោមពោធិរោងលើ ដោយបាល់ប៉េណាល់ទីកាត់សេចក្ដី ៣-១ ក្រោយប្រកួតពេញម៉ោងស្មើគ្នា ២-២។ ចំពោះប្រាក់រង្វាន់ជ័យលាភីក្រោយចប់ការប្រកួតនេះ សម្រាប់ក្រុមជើងឯក ស.ស.យ.ក ខេត្តកំពង់ចាមទទួលបានពាន អមជាមួយប្រាក់រង្វាន់ ៧ពាន់ដុល្លារ ខណៈលេខ២ ក្រុមរស្មីសន្ដិភាពពង្រទទួលបាន ៤ពាន់ដុល្លារ។ រីឯលេខ៣ ក្រុមសាលារ៉ះម៉ាស់ទទួលបាន ២ពាន់ដុល្លារ និងក្រុមលេខ៤ គឺក្រុមម្ចាស់ផ្ទះពោធិរោងលើក៏ទទួលបានប្រាក់រង្វាន់លើកទឹកចិត្ត ១ពាន់ដុល្លារផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
