បេសកជនជាន់ខ្ពស់របស់អង្គការសហប្រជាជាតិប្រចាំប្រទេសលីប៊ីកាលពីថ្ងៃពុធ បានព្រមានថា ការបែកបាក់កាន់តែខ្លាំងឡើងនៅក្នុងប្រព័ន្ធតុលាការលីប៊ី មានផលវិបាកធ្ងន់ធ្ងរចំពោះឯកភាពជាតិរបស់ប្រទេសនេះ។

លោកស្រី Hanna Serwaa Tetteh តំណាងពិសេសរបស់អគ្គលេខាធិការUN ប្រចាំប្រទេសលីប៊ី បាននិយាយថា បន្ទាប់ពីសភាតំណាងរាស្រ្តលីប៊ី បានបង្កើតតុលាការធម្មនុញ្ញកំពូលមួយនៅក្នុងទីក្រុងប៊ែនហ្គាហ្ស៊ី (Benghazi) ក្នុងឆ្នាំ ២០២៣ សភានោះ បានចាប់ផ្តើមចេញសេចក្តីសម្រេចស្របគ្នាទៅនឹងសភាធម្មនុញ្ញនៃតុលាការកំពូល នៅក្នុងរដ្ឋធានីទ្រីប៉ូលីរបស់ប្រទេសនេះ ដោយបង្កើតសេចក្តីសម្រេចផ្ទុយគ្នា       អំពីបញ្ហាសំខាន់ៗនៃរដ្ឋធម្មនុញ្ញ និងនីតិបញ្ញត្តិ។ 

លោកស្រីបានថ្លែងក្នុងអំឡុងពេលសន្និសីទសារព័ត៌មានក្រុមប្រឹក្សាសន្តិសុខថា៖«សេចក្តីសម្រេចដែលផ្ទុយគ្នា និងស្របគ្នារបស់តុលាការ ធ្វើឲ្យប៉ះពាល់ដល់ភាពស្របគ្នានៃប្រព័ន្ធច្បាប់ និងតុលាការ» ដោយព្រមានថា ប្រសិនបើមិនមានសកម្មភាពណាមួយ ត្រូវបានធ្វើឡើង ដើម្បីរក្សាឯកភាព ភាពស៊ីសង្វាក់គ្នា និងឯករាជ្យភាពនៃប្រព័ន្ធតុលាការទេ ប្រព័ន្ធច្បាប់ដែលកំពុងមានជម្លោះនេះ នឹងប៉ះពាល់ដល់សេដ្ឋកិច្ច ការបោះឆ្នោត អភិបាលកិច្ច សន្តិសុខ និងសិទ្ធិមនុស្សរបស់ប្រទេសនេះ។

ចំពោះសេដ្ឋកិច្ចរបស់ប្រទេសលីប៊ី លោកស្រីបាននិយាយថា គន្លងសេដ្ឋកិច្ចរបស់ប្រទេសនេះកំពុង «ស្ថិតក្នុងស្ថានភាពធ្លាក់ចុះ» ហើយប្រជាជនលីប៊ីកំពុងរងទុក្ខដោយសារការធ្លាក់ចុះនៃតម្លៃរូបិយប័ណ្ណ តម្លៃទំនិញដែលកំពុងកើនឡើង និងការខ្វះខាតប្រេងឥន្ធនៈជាបន្តបន្ទាប់។

បេសកជនរូបនេះ បាននិយាយថា ស្ថានភាពកាន់តែយ៉ាប់យ៉ឺន អាចបង្កឲ្យមានបញ្ហាប្រឈមផ្នែកនយោបាយ និងសន្តិសុខដែលមិននឹកស្មានដល់។ «មធ្យោបាយតែមួយគត់ដើម្បីឆ្ពោះទៅមុខ គឺដំណោះស្រាយនយោបាយ»៕