ប្រធានាធិបតីអ៊ុយក្រែន លោក Volodymyr Zelenskyy បាននិយាយថា រុស្ស៊ី និងអ៊ុយក្រែន ជិតសម្រេចបាននូវឯកសារមួយ ដែលកំណត់ពីរបៀបត្រួតពិនិត្យបទឈប់បាញ់ណាមួយ ដើម្បីបញ្ចប់សង្គ្រាមរយៈពេល ៤ឆ្នាំរវាងភាគីទាំងពីរ បន្ទាប់ពីកិច្ចចរចាសន្តិភាពដែលសម្របសម្រួលដោយសហរដ្ឋអាមេរិក នៅទីក្រុងហ្សឺណែវ កាលពីថ្ងៃពុធ (១៨ កុម្ភៈ) សប្ដាហ៍នេះ។

លោក Zelenskyy បានប្រាប់អ្នកយកព័ត៌មានថា «ជាគោលការណ៍ យោធាយល់ពីរបៀបតាមដានបទឈប់បាញ់ និងការបញ្ចប់សង្គ្រាម ប្រសិនបើមានឆន្ទៈនយោបាយ» ដោយបន្ថែមថា «ស្ទើរតែគ្រប់យ៉ាង» នៅក្នុងផ្នែកនេះ ត្រូវបានព្រមព្រៀងគ្នារួចហើយ។

នៅក្នុងកម្មវិធីសម្ភាសន៍មួយ និងត្រូវបានរាយការណ៍ដោយសារព័ត៌មានអ៊ុយក្រែន Ukrinform លោក Zelenskyy បាននិយាយថា វឌ្ឍនភាពលើបញ្ហា «នយោបាយ» មានល្បឿនយឺតជាងនេះបន្តិច ហើយបញ្ហាទឹកដីដែលខ្វែងគំនិតគ្នាបំផុត គួរតែត្រូវបានពិភាក្សាក្នុងកម្រិតមេដឹកនាំ ដើម្បីអាចព្យាយាមឈានដល់កិច្ចព្រមព្រៀងមួយ។

រុស្ស៊ី មិនព្រមដកថយពីការទាមទាររបស់ខ្លួនសម្រាប់ការគ្រប់គ្រងពេញលេញនៃតំបន់ដុនបាស ភាគខាងកើតនោះទេ ប៉ុន្តែអ៊ុយក្រែនបានច្រានចោលយ៉ាងដាច់អហង្ការ។ បច្ចុប្បន្ន រុស្ស៊ីកាន់កាប់ប្រហែល ២០% ហើយនៃទឹកដីជាតិរបស់អ៊ុយក្រែន រួមទាំងតំបន់គ្រីម៉េ និងផ្នែកខ្លះនៃតំបន់ដុនបាសភាគខាងកើត ដែលត្រូវបានរឹបអូសមុនជម្លោះឆ្នាំ២០២២។ គណៈប្រតិភូមកពីអ៊ុយក្រែន អាមេរិក និងរុស្ស៊ី បានធ្វើកិច្ចចរចាសន្តិភាពជុំចុងក្រោយបំផុតនៅទីក្រុងហ្សឺណែវ កាលពីថ្ងៃអង្គារ និងថ្ងៃពុធ សប្ដាហ៍នេះ ប៉ុន្តែមិនមានកិច្ចព្រមព្រៀងជាផ្លូវការណាមួយត្រូវបានប្រកាសនោះទេ៕