មន្ត្រីពីររូបមកពីរដ្ឋបាលលោកប្រធានាធីបតីអាមេរិក Donald Trump បានប្រាប់ប្រព័ន្ធផ្សព្វផ្សាយកាលពីថ្ងៃពុធ (១៨ កុម្ភៈ) ថា រដ្ឋមន្ត្រីការបរទេសអាមេរិក លោក Marco Rubio មានគម្រោងធ្វើដំណើរទៅកាន់អ៊ីស្រាអែល នៅសប្តាហ៍ក្រោយនេះ ដើម្បីជម្រាបពីបច្ចុប្បន្នភាពជូនដល់លោកនាយករដ្ឋមន្ត្រីអ៊ីស្រាអែល Benjamin Netanyahu ស្តីពីកិច្ចចរចានុយក្លេអ៊ែររវាងសហរដ្ឋអាមេរិក និងអ៊ីរ៉ង់។

មន្ត្រីដែលសុំមិនបញ្ចេញឈ្មោះទាំងនោះបានឱ្យដឹងថា លោក Rubio ត្រូវបានរំពឹងថា នឹងជួបជាមួយលោក Netanyahu នៅថ្ងៃទី២៨ ខែកុម្ភៈ។ ថ្មីៗនេះ សហរដ្ឋអាមេរិក និងអ៊ីរ៉ង់ បានធ្វើកិច្ចចរចាដោយប្រយោលចំនួនពីរជុំរួចមកហើយ ស្តីពីកម្មវិធីនុយក្លេអ៊ែររបស់សាធារណរដ្ឋអ៊ិស្លាមមួយនេះ។

កាលពីសប្តាហ៍មុន លោក Netanyahu បានទៅបំពេញទស្សនកិច្ចនៅសេតវិមាន ដើម្បីជំរុញឱ្យលោក Trump ធានាថា កិច្ចព្រមព្រៀងណាមួយអំពីកម្មវិធីនុយក្លេអ៊ែររបស់អ៊ីរ៉ង់ ក៏រួមបញ្ចូលទាំងជំហាននានាដើម្បីលុបបំបាត់កម្មវិធីមីស៊ីលបាលីស្ទិករបស់អ៊ីរ៉ង់ និងបញ្ចប់ការផ្តល់មូលនិធិសម្រាប់ក្រុមប្រយុទ្ធតំណាង ដូចជាក្រុមសកម្មប្រយុទ្ធហាម៉ាស និងហេសបូឡា ជាដើម។ លោក Trump កំពុងថ្លឹងថ្លែងថា តើត្រូវចាត់វិធានការយោធាប្រឆាំងនឹងទីក្រុងតេអេរ៉ង់ឬយ៉ាងណា ខណៈអាមេរិក កំពុងបង្កើនធនធានយោធារបស់ខ្លួនទៅកាន់តំបន់មជ្ឈិមបូព៌ា។

រដ្ឋបាលលោក Trump បានបញ្ជូននាវាផ្ទុកយន្តហោះ USS Gerald R. Ford ដែលជានាវាផ្ទុកយន្តហោះធំជាងគេបំផុតក្នុងពិភពលោក ពីសមុទ្រការ៉ាអ៊ីបទៅកាន់មជ្ឈិមបូព៌ា ដើម្បីចូលរួមជាមួយនាវាផ្ទុកយន្តហោះដែលមានស្រាប់នៅទីនោះ ក៏ដូចជានាវាចម្បាំងដទៃទៀត និងទ្រព្យសម្បត្តិយោធា ដែលសហរដ្ឋអាមេរិក បានបង្កើននៅក្នុងតំបន់៕