ភ្នំពេញ៖ ធនាគារជាតិនៃកម្ពុជា កំពុងបន្តតាមដានគ្រប់គ្រងអតិផរណា និងអត្រាប្តូរប្រាក់ដុល្លារ និងប្រាក់រៀល និងកំពុងបន្តសហការជាមួយស្ថាប័នជំនាញ ដើម្បីប្រមូលយកទិន្នន័យលើការគ្រប់គ្រង់អតិផរណា ខណៈថ្លៃប្រេងឥន្ធនៈបានកំពុងហក់ឡើង ដោយសារសង្រ្គាម រុស្សី-អ៊ុយក្រែន ដែលជាបច្ច័យនៃការប្រែប្រួលដល់ការផ្គត់ផ្គង់ទំនិញ ។

លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេស លើកឡើងក្នុងកិច្ច​សម្ភាសន៍​ជាមួយភ្នាក់ងារអ្នកយកព័ត៌មាន ​នៅក្នុងខួបអនុស្សាវរីយលើកទី ៤២ ​នៃការដាក់ឲ្យចរាចរ​ប្រាក់រៀលឡើងវិញ ​ដែលប្រារព្វធ្វើនៅផ្សារទំនើបជីបម៉ុង សែនសុខ នៅថ្ងៃទី ២០ ខែមីនា ឆ្នាំ២០២២នេះថា ការផ្ទុះសង្គ្រាមរវាងរុស្សី អ៊ុយក្រែន ​ជាពិសេសការឡើងថ្លៃប្រេងឥន្ធនៈ វា​កំពុង​ធ្វើ​​ឲ្យស្ថានភាពពិភពលោកមានការប្រែប្រួល ​នឹង​បានកំពុងជះឥទ្ធិពល​ដល់កម្ពុជាផងដែរ។

លោកជំទាវ បន្តថា ចំពោះការឡើងថ្លៃប្រេងឥន្ធនៈនេះ ​នឹងមានការប្រែប្រួលដល់ថ្លៃសេវា និង​មុខ​ទំនិញ​មុខផ្សេងៗ​នៅតាមទីផ្សារ​ ដែលនឹងធ្វើឲ្យប៉ះពាល់ដល់អតិផរណា។​ ចំពោះបញ្ហានេះ ធនាគារជាតិនៃកម្ពុជា ​នឹងសហការជាមួយក្រសួងសេដ្ឋកិច្ច ​និងហិរញ្ញវត្ថុ ​និងវិទ្យាស្ថានស្ថិតិជាតិ នៃ​ក្រសួងផែនការ ​ដើម្បីប្រមូល​យក​ទិន្នន័យ​លើការ​គ្រប់គ្រង់​អតិផរណា​ឲ្យបាន​ជាក់លាក់ ខណៈដែល​ឥទ្ធិពលសង្រ្គាម រុស្សី-អ៊ុយក្រែន​ បានកំពុងបន្ត ​ធ្វើឲ្យតម្លៃប្រេងសាំងកើនឡើង ដែលជា​បច្ច័យ​ប្រែប្រួល​ដល់ការផ្គត់ផ្គង់ទំនិញ ​និងគូបផ្សំភាពមិនច្បាស់​នៃការរីករាលដាលជម្ងឺកូវីដ ​១៩ ផងដែរ ។

សូមបញ្ជាក់ថា៖ ​ពាក់ព័ន្ធអតិផរណានេះ ក្នុងឆ្នាំ ២០២២​ ធនាគារជាតិនៃកម្ពុជា ​បានព្យាករថា នឹង​មានអត្រា ២,៦% ទាបជាងឆ្នាំ ២០២១ ​ដែលមានក្នុងរង្វង់ ២,៩% ,ចំណែកអត្រាប្តូរប្រាក់រៀល ធៀប​និងប្រាក់ដុល្លារអាមេរិក ​អាចនឹងប្រែប្រួល ១% ក្នុងអត្រាប្តូរប្រាក់​មានកម្រិតជាមធ្យម ​៤ ០៩៩ រៀល ក្នុង​មួយដុល្លារអាមេរិក ​ក្នុងនោះប្រាក់រៀលអាចថយចុះ ​បន្តិច ០,១% បើធៀបនឹងឆ្នាំ ២០២១ ៕អត្ថបទ៖ សុន រ៉ាឌី