យោងតាមឯកសារវាយតម្លៃរបស់យោធាអ៊ីស្រាអែល ដែលមើលឃើញដោយសារព័ទ៌មានរ៉យទ័រ និងប្រភពព័ត៌មាននៅក្នុងតំបន់ប៉ាឡេស្ទីន បានឱ្យដឹងថា ក្រុមហាម៉ាស កំពុងតែពង្រឹងការក្ដោបក្ដាប់អំណាចរបស់ខ្លួនលើតំបន់ហ្កាហ្សា ដោយការតែងតាំងអ្នកស្មោះត្រង់ឱ្យកាន់តួនាទីសំខាន់ៗក្នុងរដ្ឋាភិបាលរបស់ខ្លួន ការប្រមូលពន្ធ និងបើកប្រាក់ខែជាដើម ទោះបីជាបានប្ដេជ្ញាប្រគល់ការគ្រប់គ្រងទៅឱ្យស្ថាប័នប៉ាឡេស្ទីនថ្មីមួយក៏ដោយ។

ការបង្កើនឥទ្ធិពលជាបន្តបន្ទាប់របស់ក្រុមហាម៉ាស លើរចនាសម្ព័ន្ធអំណាចសំខាន់ៗនៅហ្កាហ្សាបានជំរុញឱ្យមានការសង្ស័យពីចក្ខុវិស័យនៃផែនការសន្តិភាពរបស់ប្រធានាធិបតីអាមេរិក Donald Trump ដែលតម្រូវឱ្យក្រុមសកម្មប្រយុទ្ធនេះ លះបង់អាវុធរបស់ខ្លួន ជាថ្នូរនឹងការដកទ័ពអ៊ីស្រាអែល ចេញពីទឹកដីនោះ។ ក្រុមប្រឹក្សាសន្តិភាពអន្តរជាតិរបស់លោក Trump ដែលមានបំណងត្រួតពិនិត្យការគ្រប់គ្រងអន្តរកាលរបស់តំបន់ហ្កាហ្សា បានបើកកិច្ចប្រជុំដំបូងរបស់ខ្លួន នៅទីក្រុងវ៉ាស៊ីនតោន កាលពីថ្ងៃព្រហស្បតិ៍កន្លងទៅ ដើម្បីជំរុញផែនការសន្តិភាពហ្កាហ្សា។

យោធាអ៊ីស្រាអែលបាននិយាយក្នុងឯកសារមួយដែលដាក់ជូនលោកនាយករដ្ឋមន្ត្រី Benjamin Netanyahu កាលពីចុងខែមករាថា៖ ក្រុមហាម៉ាសកំពុងបោះជំហានទៅមុខនៅលើទឹកដីហ្កាហ្សា ដែលមានបំណងរក្សាឥទ្ធិពល និងការក្ដោបក្តាប់របស់ខ្លួននៅក្នុងទឹកដីនេះ «ចាប់ពីថ្នាក់ក្រោមឡើងទៅថ្នាក់លើ» តាមរយៈការធ្វើសមាហរណកម្មអ្នកគាំទ្ររបស់ខ្លួនទៅក្នុងការិយាល័យរដ្ឋាភិបាល អង្គភាពសន្តិសុខ និងអាជ្ញាធរមូលដ្ឋាន។

ក្រុមហាម៉ាស បាននិយាយថា ខ្លួនត្រៀមរួចជាស្រេចដើម្បីប្រគល់ការគ្រប់គ្រងតំបន់នេះ ទៅឱ្យគណៈកម្មាធិការអ្នកបច្ចេកទេសប៉ាឡេស្ទីន ដែលគាំទ្រដោយសហរដ្ឋអាមេរិក ប៉ុន្តែក្រុមសកម្មប្រយុទ្ធនេះក៏័និយាយថា អ៊ីស្រាអែលមិនទាន់អនុញ្ញាតឱ្យសមាជិកគណៈកម្មាធិការ ចូលទៅក្នុងតំបន់ហ្កាហ្សា ដើម្បីទទួលខុសត្រូវក្នុងកិច្ចការរបស់ពួកគេនៅឡើយទេ៕