អង្គការសុខភាពពិភពលោក (WHO) បាននិយាយកាលពីថ្ងៃសៅរ៍ថា ការវាយប្រហារចំនួន ៥លើក លើមណ្ឌលថែទាំសុខភាព បានសម្លាប់មនុស្សរាប់សិបនាក់ នៅក្នុងប្រទេសស៊ូដង់ ចាប់តាំងពីដើមឆ្នាំនេះ ខណៈដែលសង្គ្រាមជិតដល់ការចាប់ផ្តើមឆ្នាំទី ៤ របស់ខ្លួនហើយ។

ការប្រយុទ្ធគ្នារវាងកងទ័ពស៊ូដង់ និងកងកម្លាំងគាំទ្ររហ័ស (RSF) បានបំផ្លាញប្រព័ន្ធវេជ្ជសាស្ត្រដែលផុយស្រួយរួចទៅហើយ ដោយមណ្ឌលថែទាំសុខភាពជាងមួយភាគបីបច្ចុប្បន្ន លែងដំណើរការ។

លោក Tedros Adhanom Ghebreyesus ប្រធានអង្គការសុខភាពពិភពលោក បានសរសេរនៅលើប្រព័ន្ធផ្សព្វផ្សាយសង្គម X ថា៖«ក្នុងរយៈពេល ៥០ ថ្ងៃដំបូងនៃឆ្នាំ ២០២៦ ការវាយប្រហារចំនួន ៥ លើកលើមណ្ឌលថែទាំសុខភាព ត្រូវបានកត់ត្រារួចហើយ នៅក្នុងប្រទេសស៊ូដង់ ដោយបានសម្លាប់មនុស្ស ៦៩ នាក់ និង៤៩នាក់រងរបួស»។

លោក Tedros បាននិយាយថា នៅថ្ងៃអាទិត្យនេះ មន្ទីរពេទ្យមួយ ត្រូវបានកំណត់គោលដៅនៅរដ្ឋ Sennar ភាគអាគ្នេយ៍ ដោយបានសម្លាប់អ្នកជំងឺបីនាក់ និង ៧នាក់ រងរបួស ក្នុងនោះមានបុគ្គលិកម្នាក់ផងដែរ ៕