ប្រទេសដាណឺម៉ាក និងដែនដីហ្គ្រីនលែន កាលពីថ្ងៃអាទិត្យ ទី២២ ខែកុម្ភៈ បានបដិសេធសំណើផ្តល់ឲ្យរបស់លោក Donald Trump ក្នុងការបញ្ជូននាវាមន្ទីរពេទ្យរបស់កងទ័ពជើងទឹកទៅកាន់កោះនៅមហាសមុទ្រអាកទិក ដែលមេដឹកនាំអាមេរិកចង់បាន។

លោក Trump បាននិយាយថា លោកកំពុងបញ្ជូន «នាវាមន្ទីរពេទ្យដ៏ធំអស្ចារ្យមួយគ្រឿងទៅកាន់ដែនដីហ្គ្រីនលែន ដើម្បីពិនិត្យព្យាបាលមនុស្សជាច្រើននាក់ដែលឈឺហើយមិនត្រូវបានគេមើលថែនៅទីនោះ»។ ប៉ុន្តែនាយករដ្ឋមន្ត្រីដែនដីហ្គ្រីនលែន លោក Jens-Frederik Nielsen ជាប្រធានរដ្ឋាភិបាលនៃតំបន់ស្វយ័តនេះ បានសរសេរនៅលើទំព័រហ្វេសប៊ុករបស់លោកថា «នោះនឹងពុំមែនជាការ អរគុណ ពីយើងទេ»។ «គំនិតរបស់លោកប្រធានាធិបតី Trump ក្នុងការបញ្ជូននាវាមន្ទីរពេទ្យរបស់សហរដ្ឋអាមេរិកទៅកាន់ដែនដីហ្គ្រីនលែន ត្រូវបានកត់សម្គាល់យ៉ាងត្រឹមត្រូវ។ ប៉ុន្តែយើងមានប្រព័ន្ធសុខភាពសាធារណៈ ដោយការថែទាំពិនិត្យព្យាបាល មិនគិតថ្លៃសម្រាប់ប្រជាជន»។ «នេះមិនមែនជាករណីនៅសហរដ្ឋអាមេរិកទេ ដែលការទៅជួបវេជ្ជបណ្ឌិតត្រូវចំណាយប្រាក់»។ រដ្ឋមន្ត្រីក្រសួងការពារជាតិដាណឺម៉ាក លោក Troels Lund Poulsen បានប្រាប់អ្នកសារព័ត៌មាន DR របស់ដាណឺម៉ាក ថា «ប្រជាជនហ្គ្រីនលែន ទទួលបានការថែទាំសុខភាពតាមដែលខ្លួនត្រូវការ។ ពួកគេទទួលបានទាំងនៅដែនដីហ្គ្រីនលែន ឬប្រសិនបើពួកគេត្រូវការការព្យាបាលឯកទេស ពួកគេទទួលបានវានៅប្រទេសដាណឺម៉ាក»។ លោកបាននិយាយបន្ថែមថា «វាមិនចាំបាច់មានតម្រូវការសម្រាប់គំនិតផ្តួចផ្តើមថែទាំសុខភាពពិសេសនៅដែនដីហ្គ្រីនលែននោះទេ»។

នៅដែនដីហ្គ្រីនលែន ក៏ដូចជានៅប្រទេសដាណឺម៉ាកដែរ ការទទួលបានការថែទាំសុខភាព គឺមិនគិតថ្លៃសម្រាប់ប្រជាជន។ មានមន្ទីរពេទ្យក្នុងតំបន់ចំនួនប្រាំកន្លែងនៅទូទាំងកោះមហាសមុទ្រអាកទិកដ៏ធំល្វឹងល្វើយ ដោយមន្ទីរពេទ្យមួយនៅរដ្ឋធានី Nuuk បម្រើអ្នកជំងឺមកពីគ្រប់ទិសទីនៃដែនដីនេះ។