កងកម្លាំងសន្តិសុខប្រទេសម៉ិកស៊ិក បានសម្លាប់មេក្លោងគ្រឿងញៀនម្នាក់ដែលដឹកនាំអង្គការឧក្រិដ្ឋកម្មដ៏មានឥទ្ធិពលបំផុតមួយនៅក្នុងប្រទេស បង្កឱ្យមានរលកនៃអំពើហិង្សានៅក្នុងតំបន់ជាច្រើន រួមទាំងរដ្ឋ Jalisco ភាគខាងលិច។

អាជ្ញាធរការពារជាតិប្រទេសម៉ិកស៊ិកបាននិយាយថា លោក « El Mencho » បានរងរបួសនៅក្នុងការប៉ះទង្គិចជាមួយទាហាននៅក្នុងទីក្រុង Tapalpa ក្នុងរដ្ឋ Jalisco កាលពីថ្ងៃអាទិត្យ ហើយបានស្លាប់ខណៈ កំពុងបញ្ជូនតាមយន្តហោះទៅកាន់ទីក្រុង Mexico City ។

សហរដ្ឋអាមេរិកផ្តល់រង្វាន់ចំនួន១៥ លានដុល្លារសម្រាប់ក្បាលមេក្លោងរូបនេះ។ ប្រតិបត្តិការនៅប្រទេសម៉ិកស៊ិក បានបង្កឱ្យមានរលកនៃអំពើហិង្សា ដោយខ្មាន់កាំភ្លើងបានដុតរថយន្ត និងបិទផ្លូវហាយវ៉េនៅក្នុងរដ្ឋមួយចំនួន។

រដ្ឋធានី Guadalajara របស់រដ្ឋ Jalisco ដែលនឹងធ្វើជាម្ចាស់ផ្ទះការប្រកួតកីឡាក្នុងព្រឹត្តិការណ៍ FIFA World Cup នាពេលខាងមុខ ត្រូវបានប្រែក្លាយទៅជាទីក្រុងខ្មោចកាលពីយប់ថ្ងៃអាទិត្យ ខណៈជនស៊ីវិលបានប្រមូលផ្តុំគ្នានៅទីនោះ។ វីដេអូដែលចែករំលែកលើបណ្តាញសង្គមបានបង្ហាញមនុស្សកំពុងរត់ឆ្លងកាត់អាកាសយានដ្ឋាន Guadalajara ដោយភ័យស្លន់ស្លោ និងមានផ្សែងហុយឡើងនៅលើទីក្រុងទេសចរណ៍ Puerto Vallarta។ អភិបាលរដ្ឋ Jalisco លោក Pablo Lemus បានប្រាប់ប្រជាជនឱ្យស្នាក់នៅក្នុងលំនៅឋាន និងផ្អាកការដឹកជញ្ជូនសាធារណៈ។ ថ្នាក់រៀនត្រូវបានលុបចោលនៅថ្ងៃចន្ទនេះក្នុងរដ្ឋជាច្រើន។ ប្រធានាធិបតីម៉ិកស៊ិក លោកស្រី Claudia Sheinbaum បានសរសើរកងកម្លាំងសន្តិសុខរបស់ប្រទេសនៅក្នុងការបង្ហោះនៅលើបណ្តាញ X ហើយបានអំពាវនាវឱ្យមានភាពស្ងប់ស្ងាត់។

លោកស្រីបានសរសេរថា «មានការសម្របសម្រួលជាមួយរដ្ឋាភិបាលនៃរដ្ឋទាំងអស់»។ «នៅក្នុងទឹកដីភាគច្រើនរបស់ប្រទេស សកម្មភាពនានាកំពុងដំណើរការទៅដោយភាពប្រក្រតីទាំងស្រុង»។