ក្រុមបាតុករបានប្រមូលផ្តុំគ្នានៅទីក្រុងតូរ៉ុនតូ(Toronto) ប្រទេសកាណាដាកាលពីថ្ងៃអាទិត្យ២២ កុម្ភៈដើម្បីបង្ហាញការគាំទ្រដល់អ៊ុយក្រែន នៅមុនខួបលើកទី៤ឆ្នាំនៃការវាយលុករបស់រុស្ស៊ី។

អ្នកចូលរួមការជួបជុំម្នាក់មកពីអ៊ុយក្រែន លោក Roman Fomin បាននិយាយថា ពួកលោកជឿថាជម្លោះនឹងបន្តដោយគ្មានការគាំទ្រពីអន្តរជាតិកាន់តែខ្លាំង ដោយជំរុញឱ្យរដ្ឋាភិបាលនានាផ្តល់ការគាំទ្រកាន់តែច្រើនដល់ទីក្រុងគីវ និងអំពាវនាចឲ្យរុស្ស៊ីបញ្ចប់សង្គ្រាម។

អ្នកចូលរួមម្នាក់ទៀតឈ្មោះ Olesia Smyrnova មកពីអ៊ុយក្រែន បាននិយាយថា ប្រជាជនអ៊ុយក្រែនត្រូវការសកម្មភាពជាក់ស្តែងជាជាងពាក្យសម្តី ដោយហៅផលវិបាកនៃសង្គ្រាមដែលកំពុងបន្តថាគួរឱ្យសោកសៅ និងអយុត្តិធម៌ណាស់។

អ្នកនយោបាយកាណាដា លោក Doug Ford ក៏បានថ្លែងទៅកាន់ហ្វូងមនុស្សផងដែរ ដោយសន្យាថានឹងបន្តគាំទ្រអ៊ុយក្រែន និងអំពាវនាវឱ្យមានសាមគ្គីភាពក្នុងចំណោមសម្ព័ន្ធមិត្ត។

ចំណែកនៅក្នុងប្រទេសហុងគ្រីវិញ ពលរដ្ឋហុងគ្រីប្រហែល១ពាន់នាក់ និងជនជាតិអ៊ុយក្រែន ក៏បានដើរក្បួនក្នុងរដ្ឋធានី Budapest កាលពីថ្ងៃអាទិត្យ២២កុម្ភៈបង្ហាញការគាំទ្រដល់អ៊ុយក្រែនផងដែរ។

ជាមួយគ្នានោះ នៅក្នុងទីក្រុង Milan ប្រទេសអ៊ីតាលី វិញ ក្រុមអ្នកគាំទ្រអ៊ុយក្រែនបានចេញដើរពាសពេញដងផ្លូវនានាអំពាវនាវឲ្យបញ្ចប់សង្គ្រាម និងតវ៉ាប្រឆាំងការចូលរួមរបស់ក្រុមអត្តពលិករុស្ស៊ីនិងបេឡារុសមួយចំនួនក្នុងព្រឹត្តិការណ៍ Paralympics ដែលនឹងចូលមកដល់នាពេលខាងមុខ។

ថ្ងៃអង្គារ២៤ កុម្ភៈ ស្អែកនេះ នឹងជាថ្ងៃខួបលើកទី៤ឆ្នាំគត់នៃការឈ្លានពានទ្រង់ទ្រាយធំរបស់រុស្ស៊ី ដែលបានសម្លាប់មនុស្សរាប់សែននាក់នៃភាគីជម្លោះទាំងសងខាង បណ្តេញមនុស្សរាប់លាននាក់ចេញពីផ្ទះសម្បែងរបស់ពួកគេ និងបំផ្លាញទីក្រុង ទីប្រជុំជន និងភូមិនានាឋានរបស់អ៊ុយក្រែន៕