បន្ទាយមានជ័យ៖ បណ្ដាអង្គទូត និងអង្គការអន្តរជាតិប្រចាំនៅកម្ពុជាសរុប ២១ ស្ថាប័ន បាន​ទៅ​ពិនិត្យ​ជាក់ស្ដែងផ្ទាល់នៅទីតាំងយោធាថៃឈ្លានពានចូលកម្ពុជា ក្នុងភូមិសាស្រ្ដ ភូមិជោគជ័យ ឃុំ​អូរបី​ជាន់ ស្រុកអូរជ្រៅ ខេត្តបន្ទាយមានជ័យ ដែលកងទ័ពថៃរាយបន្លាលួស និង​ដាក់​ទូកុង​តឺន័រ​ឈ្លាន​ពាន​ចូលដែនអធិបតេយ្យភាពកម្ពុជា និងសួរសុខ​ទុក្ខជនភៀស​សឹក​នៅ​មណ្ឌល​សុវត្ថិភាព​វត្ត​ចាន់​ស៊ី នៅថ្ងៃទី២៣ ខែកុម្ភៈ ឆ្នាំ២០២៦នេះ។ ដំណើរ​ចុះ​ពិនិត្យផ្ទាល់នេះ បានដឹកនាំដោយ លោកជំទាវ អ៊ាត សោភា រដ្ឋមន្ត្រីស្តីទី ក្រសួង​ការ​បរទេស និងសហប្រតិបត្តិការអន្តរជាតិ។

ក្នុងដំណើរចុះពិនិត្យមើលស្ថានការណ៍ព្រំដែននេះ បណ្ដាអង្គទូត និង​អង្គការ​អន្តរជាតិ​ទាំង​អស់​ក៏​បាន​ពិនិត្យ​មើល​ដោយផ្ទាល់ តំបន់មួយចំនួននៅព្រំដែន ជាពិសេសតំបន់ដែក​យោធា​ថៃ​ឈ្លាន​ពាន​ចូល​ក្នុងដែនអធិបតេយ្យភាពកម្ពុជា ដាក់ទូរកុងតឺន័រ និងបន្លាលួស ក្រោយមាន​កិច្ច​ព្រម​ព្រៀង​បទ​ឈប់បាញ់រវាងភាគីទាំងពីរ កម្ពុជា-ថៃ កាលពីថ្ងៃទី២៧ ខែធ្នូ ឆ្នាំ២០២៥។ ខណៈ​សកម្ម​ភាព​ដាក់ទូរកុងតឺន័រ និងបន្លាលួសពី​សំណាក់​ក្រុម​យោធាថៃ​បាន​ធ្វើ​ឱ្យ​ជន​ស៊ីវិល​កម្ពុជា​រាប់​ពាន់​គ្រួសារ​មិនទាន់អាចត្រឡប់ចូលទៅផ្ទះសម្បែងវិញ និងបន្តស្នាក់នៅមណ្ឌល​ជនភៀសឹក​នៅ​ឡើយ។​

បើតាមរបាយការណ៍របស់រដ្ឋបាលខេត្តបន្ទាយមានជ័យបានឱ្យដឹងថា បច្ចុប្បន្ន មានជនភៀស​សឹក​ដែល​កំពុងស្នាក់នៅបណ្តោះអាសន្ននៅវត្តចាន់ស៊ីសាមគ្គីរតនារាម ដែលជាជន​ស៊ីវិល​ស្លូត​ត្រង់​ត្រូវ​បាន​ជម្លៀសចេញពីផ្ទះសម្បែង បន្ទាប់ពីយោធាថៃ បើកការបាញ់ប្រហារមកលើជនស៊ីវិល ដោយ​គ្មានមូលហេតុ កាលពីរសៀលថ្ងៃទី១២ ខែវិច្ឆិកា ឆ្នាំ២០២៥ នៅក្នុងភូមិព្រៃចាន់ និង​ភូមិ​ជោគ​ជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលមានជនភៀស សឹកសរុប ១ ២៤៨ គ្រួសារ។

សូមរម្លឹកថា បើទោះជាមានបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ កន្លងទៅ ហើយ​ដែល​ភាគី​ទាំងពីរបានឯកភាពគ្នា ជាពិសេសក្នុងចំណុចទី៤ ដែលបានចែងថា «ភាគី​ទាំង​ពីរ​ឯកភាព​អនុញ្ញាត​​ឱ្យជនស៊ីវិលរស់នៅក្នុងតំបន់ព្រំដែនដែល​រង​ផល​ប៉ះពាល់​វិល​ត្រឡប់​ទៅ​ផ្ទះ​សម្បែង និងប្រកបជីវភាពរស់នៅធម្មតារបស់ពួកគេវិញក្នុងពេលឆាប់ៗបំផុត ដោយគ្មានការរារាំង និង​ដោយមានសុវត្ថិភាព និងសេចក្តីថ្លៃថ្នូរ នៅក្នុងតំបន់រៀងៗខ្លួន»។ ផ្ទុយទៅ​វិញ​កង​កម្លាំង​ឈ្លាន​ពាន​ថៃ បាននិងកំពុងបង្កើតស្ថានភាពថ្មីនៅលើទីតាំងជាក់ស្តែង ដែលកម្ពុជា​មិន​អាច​ទទួល​យក​បាន​ជាដាច់ខាត តាមរយៈការរាយបន្លលួស ដាក់ទូកុងតឺន័រ និងបំផ្លាញផ្ទះប្រជាពលរដ្ឋ។ រាជរដ្ឋាភិបាលកម្ពុជាក៏បានប្រកាសតវ៉ាជាផ្លូវការតាមរយៈក្រសួងការបរទេស និង​សហ​ប្រតិបត្តិការ​អន្តរជាតិ ជាបន្តបន្ទាប់ដោយប្រឆាំងដាច់ខាតនឹងសកម្មភាពទាំងនេះ ហើយកម្ពុជា​មិន​ទទួល​ស្គាល់ដាច់ខាតការកែប្រែខ្សែបន្ទាត់ព្រំដែន ឬការកាន់កាប់​ទឹក​ដី​ដោយ​ខុស​ច្បាប់​អន្តរជា​តិ ​តាមរយៈការប្រើប្រាស់កម្លាំងឡើយ។

សូមជម្រាបថា បណ្ដាអង្គទូត និងអង្គការអន្តរជាតិនានាក៏នឹងអញ្ជើញទៅទស្សនា​ផ្ទាំង​រូបគំនូ​រ​សិល្បៈ​ដើម្បី​សន្តិភាព នៅកណ្តាលក្រុងសៀមរាប ខេត្តសៀមរាប ដែលផ្ទាំងរូបគំនូរនេះ គឺ​តាំង​បង្ហាញ​ពី​ការ​ពិត និងការឈឺចាប់នៃសង្គ្រាម ដោយការឈ្លាន​ពាន​រប​ស់ក​ង​ទ័ព​ថៃ​មក​លើដែ​នអ​ធិបេត​យ្យក​ម្ពុជា។

បណ្ដាអង្គទូត និងអង្គការអន្តរជាតិ ទាំងនោះ រួមមាន សហរដ្ឋអាមេរិក, ចក្រភពអង់គ្លេស, EU, អាល្លឺម៉ង់, រុស្ស៊ី, ឆេក, កាណាដា, តួគី, ឥណ្ឌា,ប៉ាគីស្ថាន, ជប៉ុន, សិង្ហបុរី, ម៉ាឡេស៊ី, វៀតណាម, ហ្វីលីពីន,មីយ៉ាន់ម៉ា(ភូមា) ប្រុយណេ, ទីម័រ និងឡាវ ព្រមទាំង អង្គការស្បៀងអាហារ និងកសិកម្មនៃអង្គការសហប្រជាជាតិប្រចាំនៅកម្ពុជា (FAO) និង អង្គការអន្តរជាតិទេសន្តរប្រវេសន៍ប្រចាំកម្ពុជា(IOM)៕ អត្ថបទ៖ ធូ វិរៈ