នៅថ្ងៃចន្ទ (ទី២៣ ខែកុម្ភៈ ឆ្នាំ២០២៦) នេះ ប្រទេសអ៊ីរ៉ង់បានបញ្ជាក់ថា ការវាយប្រហារណាមួយរបស់សហរដ្ឋអាមេរិក ក្នុងរួមទាំងការវាយប្រហារមានកំណត់ផងដែរ នឹងជា «ទង្វើឈ្លានពាន» ដែលនឹងជំរុញឲ្យមានការឆ្លើយតប បន្ទាប់ពីលោកប្រធានាធិបតី Donald Trump បានលើកឡើងថា លោកកំពុងពិចារណាពីការវាយប្រហារមានកំណត់លើអ៊ីរ៉ង់។

នៅឯសន្និសីទសារព័ត៌មានមួយ ក្នុងទីក្រុងតេអេរ៉ង់ ដែលមានអ្នកសារព័ត៌មានរបស់ទីភ្នាក់ងារសារព័ត៌មាន AFP បានចូលរួម អ្នកនាំពាក្យក្រសួងការបរទេស លោក Esmaeil Baqaei បានប្រាប់ឲ្យដឹងថា៖ «ពាក់ព័ន្ធនឹងសំណួរដំបូងរបស់អ្នក ទាក់ទងនឹងការវាយប្រហារមានកំណត់ ខ្ញុំគិតថា មិនមានការវាយប្រហារមានកំណត់នោះទេ»។

លោក Baqaei បានបញ្ជាក់ថា៖ «ទង្វើឈ្លានពាន នឹងត្រូវបានចាត់ទុកថា ជាទង្វើឈ្លានពាន។ នេះគឺច្បាស់លាស់ ពោលគឺគ្មានអ្វីត្រូវពន្យល់ទេ។ ហើយរដ្ឋណាមួយ នឹងឆ្លើយតបទៅនឹងទង្វើឈ្លានពានដែលជាផ្នែកមួយនៃសិទ្ធិការពារខ្លួនដោយធម្មជាតិនោះ ហេតុដូច្នេះ នោះជាអ្វីដែលយើងនឹងធ្វើ»។

គួរបញ្ជាក់ថា លោក Trump បាននិយាយកាលពីថ្ងៃសុក្រសប្ដាហ៍កន្លងទៅថា លោកកំពុងពិចារណាលើការវាយប្រហារមានកំណត់ ប្រសិនបើទីក្រុងតេអេរ៉ង់មិនឈានដល់កិច្ចព្រមព្រៀងជាមួយសហរដ្ឋអាមេរិកទេនោះ។ លោកបានឆ្លើយតបបន្ទាប់ពីមានសំណួរពីអ្នកយកព័ត៌មានថា៖ «ខ្ញុំគិតថា ខ្ញុំអាចនិយាយបានថាខ្ញុំកំពុងពិចារណារឿងនោះ»។

ប្រទេសទាំង២ បានបញ្ចប់ការចរចាដោយប្រយោលជុំទី២ នៅប្រទេសស្វីស កាលពីថ្ងៃអង្គារសប្ដាហ៍មុន ក្រោមការសម្របសម្រួលរបស់ប្រទេសអូម៉ង់ ដោយកើតឡើងស្របនឹងការបង្កើនកងកម្លាំងយោធាដ៏ធំរបស់សហរដ្ឋអាមេរិក នៅក្នុងតំបន់។ កិច្ចពិភាក្សាបន្ថែមទៀត ដែលត្រូវបានបញ្ជាក់ដោយអ៊ីរ៉ង់ និងអូម៉ង់ ប៉ុន្តែមិនមែនដោយសហរដ្ឋអាមេរិកនោះ ត្រូវបានគ្រោងទុកសម្រាប់ថ្ងៃព្រហស្បតិ៍នេះ៕