ប្រទេសឆាដបានបិទព្រំដែនភាគខាងកើតរបស់ខ្លួន ជាមួយស៊ូដង់ នាថ្ងៃចន្ទ (ទី២៣ ខែកុម្ភៈ ឆ្នាំ២០២៦) បន្ទាប់ពីការប៉ះទង្គិចគ្នានៅចុងសប្តាហ៍ ដែលទាក់ទងនឹងសង្គ្រាមស៊ីវិលនៅស៊ូដង់ បានសម្លាប់ទាហានឆាដ ៥នាក់។ នេះបើតាមប្រភពចំនួន ២ ដែលបានប្រាប់សារព័ត៌មាន Reuters។

ជម្លោះ នៅក្នុងប្រទេសស៊ូដង់ រវាងកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា (RSF) ដែលបានផ្ទុះឡើងនៅក្នុងខែមេសា ឆ្នាំ២០២៣ បានរីករាលដាលដល់ទឹកដីឆាដម្ដងម្កាល ដែលបណ្តាលឲ្យមានអ្នកស្លាប់ និងខូចខាតទ្រព្យសម្បត្តិ។

មន្ត្រីឆាដម្នាក់បានប្រាប់សារព័ត៌មាន Reuters ថា ការប៉ះទង្គិចគ្នា កាលពីថ្ងៃសៅរ៍ចុងសប្ដាហ៍កន្លងមក រវាងកងកម្លាំង RSF និងយុទ្ធជនកងជីវពលដែលស្មោះត្រង់នឹងរដ្ឋាភិបាលស៊ូដង់ នៅក្នុងទីក្រុងព្រំដែន Tine បានសម្លាប់ទាហាន ៥នាក់ និងជនស៊ីវិល ៣នាក់ ហើយមនុស្ស ១២នាក់ផ្សេងទៀតបានរងរបួស។

ចំណែកមន្ត្រីឆ្មាំព្រំដែនម្នាក់ នៅទីក្រុង Tine បានបញ្ជាក់ពីការស្លាប់របស់ទាហានទាំង ៥រូប និងបាននិយាយថា វិធានការសន្តិសុខបន្ថែម គឺត្រូវការចាំបាច់ ដើម្បីការពារជនស៊ីវិល នៅខាងទឹកដីឆាដ។

ដោយបាននិយាយក្នុងលក្ខខណ្ឌមិនបញ្ចេញឈ្មោះ ដោយសារតែពួកគេមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ ប្រភពទាំង២ បានប្រាប់ថា កងទ័ពឆាដបន្ថែមទៀត កំពុងត្រូវបានដាក់ពង្រាយទៅកាន់តំបន់នោះ។

រដ្ឋាភិបាលឆាដ បានប្រាប់ឲ្យដឹងនៅថ្ងៃចន្ទថា ព្រំដែននឹងនៅតែបិទរហូតដល់មានការជូនដំណឹងបន្ថែម ដោយលើកឡើងពី «ការរំលោភចូលម្តងហើយម្តងទៀត និងការរំលោភបំពានដែលប្រព្រឹត្តដោយកងកម្លាំងនៅក្នុងជម្លោះ នៅស៊ូដង់»។

កងទ័ពស៊ូដង់ និងកងកម្លាំង RSF មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ៕