លោកប្រធានាធិបតីអាមេរិក Donald Trump បានគំរាមប្រទេសទាំងឡាយកាលពីថ្ងៃចន្ទ ២៣ កុម្ភៈ សប្ដាហ៍នេះជាមួយនឹងការដាក់ទណ្ឌកម្មលើការដំឡើងពន្ធ ប្រសិនបើពួកគេជ្រើសរើសលេងហ្គេម បន្ទាប់ពីការបរាជ័យនៃគោលនយោបាយពាណិជ្ជកម្មរបស់លោកនៅចំពោះមុខតុលាការកំពូល ប៉ុន្មានម៉ោងមុនពេលពន្ធថ្មីត្រូវបានកំណត់ឱ្យចាប់ផ្តើម។ 

លោក Trump បានសរសេរលើប្រព័ន្ធផ្សព្វផ្សាយសង្គមថា ប្រទេសណាមួយដែលចង់ លេងហ្គេម ជាមួយនឹងការសម្រេចចិត្តរបស់តុលាការកំពូលដ៏គួរឱ្យអស់សំណើច ជាពិសេសប្រទេសដែលបានដើរខ្សែលើសហរដ្ឋអាមេរិកអស់រយៈពេលជាច្រើនឆ្នាំ និងស្ទើររាប់ទសវត្សរ៍ នឹងត្រូវប្រឈមនឹងពន្ធខ្ពស់ជាង និងធ្ងន់ធ្ងរជាងអ្វីដែលពួកគេទើបតែយល់ព្រមថ្មីៗនេះ។

តុលាការកំពូលបានលុបចោលពន្ធសកលរបស់លោក Trump កាលពីថ្ងៃសុក្រសប្តាហ៍មុន ដោយសម្រេចថា លោកបានធ្វើលើសពីសិទ្ធិអំណាចរបស់លោកក្នុងការអនុវត្តន៍អំណាចសេដ្ឋកិច្ចគ្រាអាសន្នដើម្បីដាក់ពន្ធទាំងនោះ។  

ការសម្រេចនេះបានធ្វើឱ្យមានផលប៉ះពាល់យ៉ាងខ្លាំងដល់របៀបវារៈសេដ្ឋកិច្ចរបស់លោក Trump ដែលពន្ធ និងសមត្ថភាពរបស់លោកក្នុងការដាក់ពន្ធទាំងនោះយ៉ាងឆាប់រហ័ស គឺជាលក្ខណៈពិសេសសំខាន់មួយ។

នៅក្នុងសេចក្តីជូនដំណឹងមួយដែលបានបង្ហោះកាលពីថ្ងៃអាទិត្យ ការិយាល័យគយ និងការពារព្រំដែនសហរដ្ឋអាមេរិកបាននិយាយថា ខ្លួននឹងឈប់ប្រមូលពន្ធ ដែលតុលាការបានលុបចោលចាប់ពីថ្ងៃអង្គារសប្ដាហ៍នេះតទៅ។បន្ទាប់ពីតុលាការកំពូលបានចេញសេចក្ដីសម្រេចប្រឆាំងនឹងគោលនយោបាយដំឡើងពន្ធជាក់លាក់របស់សហរដ្ឋអាមេរិករបស់លោក Trump កាលពីសប្តាហ៍មុន មេដឹកនាំអាមេរិករូបនេះ បានងាកទៅរកច្បាប់ដាច់ដោយឡែកមួយដើម្បីចុះហត្ថលេខាលើក្រឹត្យមួយសម្រាប់ពន្ធទូលំទូលាយ១០%លើការនាំចូល ដែលចូលជាធរមាននៅថ្ងៃអង្គារសប្ដាហ៍នេះ។ក្រោយមកលោកបានដំឡើងកម្រិតពន្ធនេះដល់១៥%៕