នៅថ្ងៃអង្គារ (ទី២៤ ខែកុម្ភៈ ឆ្នាំ២០២៦) ក្រសួងពាណិជ្ជកម្មចិន បានចាត់វិធានការប្រឆាំងនឹងក្រុមហ៊ុន និងអង្គភាពជប៉ុនចំនួន ៤០ ដោយលើកឡើងពីក្ដីបារម្ភអំពីសន្តិសុខជាតិ ជុំវិញទំនាក់ទំនងយោធារបស់ពួកគេ។

ក្រសួងបានដាក់ចេញនូវការគ្រប់គ្រងការនាំចេញលើអង្គភាពចំនួន ២០ ក្នុងនោះរួមទាំងក្រុមហ៊ុន Mitsubishi និងទីភ្នាក់ងារអវកាសជប៉ុន ដោយចោទប្រកាន់ពួកគេថា បានជួយលើកកម្ពស់សមត្ថភាពយោធារបស់ជប៉ុន។ ហើយក្រសួងបានរាប់បញ្ចូលអង្គភាពជប៉ុន ២០ បន្ថែមទៀត ក្នុងនោះរួមទាំងក្រុមហ៊ុន Subaru ទៅក្នុង «បញ្ជីតាមដាន» ដែលតម្រូវឲ្យមានការពិនិត្យឡើងវិញយ៉ាងតឹងរ៉ឹង លើការនាំចេញនូវ «របស់របរប្រើប្រាស់បានទាំងយោធា និងស៊ីវិល»។

សេចក្តីថ្លែងការណ៍របស់ក្រសួងពាណិជ្ជកម្មបានឲ្យដឹងថា៖ «វិធានការទាំងនេះ មានគោលបំណងទប់ស្កាត់សកម្មភាពធ្វើយោធូបនីយកម្មឡើងវិញ និងមហិច្ឆតានុយក្លេអ៊ែររបស់ជប៉ុន ហើយមានភាពស្របច្បាប់ សមហេតុផល និងត្រឹមត្រូវតាមច្បាប់ទាំងស្រុង»។

ក្រសួងបានបញ្ជាក់ថា៖ «វិធានការចុះបញ្ជីស្របច្បាប់របស់ចិន ផ្តោតតែលើអង្គភាពជប៉ុនមួយចំនួនតូចប៉ុណ្ណោះ ពោលគឺជាវិធានការពាក់ព័ន្ធដែលផ្តោតលើរបស់របរប្រើប្រាស់បានទាំងយោធា និងស៊ីវិល ហើយមិនប៉ះពាល់ដល់សេដ្ឋកិច្ចធម្មតា (ការដោះដូរទំនិញ) និងពាណិជ្ជកម្មរវាងចិន និងជប៉ុនទេ»។ ក្រសួងបានបន្ថែមថា៖ «អង្គភាពជប៉ុនដែលស្មោះត្រង់ និងគោរពច្បាប់ មិនមានអ្វីដែលត្រូវព្រួយបារម្ភនោះឡើយ»។

ក្រុមហ៊ុននានាអាចដាក់ពាក្យស្នើសុំឲ្យដកចេញពី «បញ្ជីតាមដាន» ប្រសិនបើពួកគេសហការជាមួយលក្ខខណ្ឌផ្ទៀងផ្ទាត់របស់ទីក្រុងប៉េកាំង។

ប្រទេសចិនបានបង្កើនសម្ពាធលើប្រទេសជិតខាងរបស់ខ្លួន ចាប់តាំងពីនាយករដ្ឋមន្ត្រីជប៉ុន លោកស្រី Sanae Takaichi បានលើកឡើងកាលពីខែវិច្ឆិកាថា ទីក្រុងតូក្យូអាចនឹងមានវិធានការយោធា ចំពោះការវាយប្រហារលើកោះតៃវ៉ាន់ ដែលទីក្រុងប៉េកាំងបានប្ដេជ្ញាថា នឹងគ្រប់គ្រងដោយកម្លាំង ប្រសិនបើចាំបាច់៕