នៅថ្ងៃអង្គារនេះ ប្រជាពលរដ្ឋរស់នៅក្នុងតំបន់ Kharkiv បានប្រារព្ធខួប ៤ឆ្នាំនៃការវាយលុកពេញបន្ទុករបស់រុស្ស៊ី ជាមួយនឹងអាម្មរណ៍សង្ស័យ និងក្តីសង្ឃឹមសម្រាប់ការបញ្ចប់ជម្លោះ ។

អ្នកស្រុកមួយចំនួន ពុំមានជំនឿថា សង្រ្គាមនឹងអាចបញ្ចប់ក្នុងពេលដ៏ខ្លីខាងមុខនេះឡើយ បើទោះបីជាកិច្ចព្រមព្រៀងសន្តិភាព ត្រូវបានចុះហត្ថលេខាក៏ដោយ ។

អ្នកស្រី Oksana គឺជាបេឡាធិការីធនាគារវ័យ ៤៨ឆ្នាំមួយរូប និយាយថា វានឹងបញ្ចប់ដោយផ្លូវការ ប៉ុន្តែវាមិនផ្លូវការនោះទេ ។ អ្នកស្រីមិនគិតថា សង្រ្គាមនឹងត្រូវបញ្ចប់ភ្លាមៗនោះទេ អ្នកស្រីគិតថា ពួកយើងនឹងរស់នៅក្នុងស្ថានភាពបែបនេះ រយៈពេលយូរទៀត ។

ចំណែកឯអ្នកស្រី Liudmyla Martina គឺជាអ្នកស្រាវជ្រាវវ័យ ៥៥ឆ្នាំមួយរូប បាននិយាយរៀបរាប់ពីឱសានវាទខកខានជាច្រើនឆ្នាំ ក្នុងការវិលត្រឡប់ទៅកាន់ផ្ទះដែលត្រូវបានគេកាន់កាប់ បើទោះបីជាអ្នកស្រីរក្សាជំនឿមុតមាំថា ទីបញ្ចប់ទឹកដីនឹងត្រូវប្រគល់ជូនអ៊ុយក្រែនវិញក៏ដោយ ។

អ្នកស្រីនិយាយថា អ្នកស្រីនៅតែមានជំនឿចិត្តថា ពួកយើងនឹងវិលត្រឡប់ទៅផ្ទះវិញ ហើយវានឹងក្លាយជាផ្ទះរបស់អ៊ុយក្រែនពួកយើង ។

ទោះបីជាយ៉ាងណាក៏ដោយ ពលរដ្ឋអ៊ុយក្រែនខ្លះមានទស្សនៈយល់ឃើញផ្សេង។ លោក Serhii Huzii គឺជាសន្តិសុខវ័យ ៥៩ឆ្នាំមួយរូប និយាយថា លោកមានជំនឿថា វាមិនឆាប់ដូចមាត់នោះទេ ពីព្រោះថា មនុស្សអាក្រក់ទាំងនោះមានធនធានច្រើនណាស់ ។ ពួកយើងត្រូវតែបន្តរង់ចាំទៀត ។

លោក Oleksandr Mosiy វ័យ ៤៧ឆ្នាំ ដែលបម្រើការនៅធនាគារ និយាយដែរថា លោកសង្ឃឹមថា ជម្លោះនឹងត្រូវបញ្ចប់ ក្នុងរយៈពេល ១ឆ្នាំទៀត បើសិនជាវាមានរយៈពេលជាង ១ឆ្នាំ ពួកយើងមិនអាចស៊ូទ្រាំបានទេ ប៉ុន្តែពួកយើងសង្ឃឹមថាបែបនេះទៅចុះ ។

ស្ថិតនៅចម្ងាយប្រហែល ៣០ម៉ែត្រពីព្រំដែនរុស្ស៊ី តំបន់ Kharkiv នៅតែស្ថិតក្រោមការផ្លោងគ្រាប់កាំភ្លើងធំឥតឈប់ឈរ ខណៈដែលផ្នែកខ្លះទៀតនៃតំបន់ Kharkiv បន្តកាន់កាប់ដោយកងកម្លាំងរុស្ស៊ី ។

យោងតាមការអះអាងរបស់អាជ្ញាធរក្នុងស្រុក បានឲ្យដឹងថា មនុស្សយ៉ាងហោច ១០នាក់ ត្រូវបានសម្លាប់នៅក្នុងតំបន់ Kharkiv ដោយសារការវាយប្រហាររបស់រុស្ស៊ី ក្នុងរយៈពេល ១សប្តាហ៍កន្លងមកនេះ ៕