យោធាម៉ិកស៊ិកនៅបន្តដាក់ពង្រាយទៅកាន់ទីតាំងនៃប្រតិបត្តិការកងទ័ពដែលបានចាប់ និងសម្លាប់មេខ្លោងគ្រឿងញៀនលោក Nemesio Oseguera នៅទីក្រុង Tapalapa ។

ក្រុមអាជ្ញាធរនិយាយថា មនុស្សយ៉ាងហោច ៦២នាក់ ត្រូវបានសម្លាប់នៅក្នុងការវាយឆ្មក់កាលពីព្រឹកថ្ងៃអាទិត្យ លើលោក Oseguera និងនៅក្នុងអំពើហិង្សាជាបន្តបន្ទាប់ រួមទំាងសមាជិកនគរបាលឆ្មាំជាតិ ២៥នាក់ និងសមាជិកឧក្រិដ្ឋជនសង្ស័យ ៣៤នាក់ ខណៈពេលដែលក្រុមភក្តីភាពនឹងមេខ្លោងគ្រឿងញៀននេះ បានដុតកម្ទេចរថយន្តនៅតាមផ្លូវបិទ ៨៥ខ្សែ ក្នុងរដ្ឋរាប់សិបកន្លែង ។

លោកស្រីប្រធានាធិបតី Claudia Sheinbaumនិយាយកាលពីព្រឹកថ្ងៃចន្ទថា ស្ថានភាពមានសភាពធម្មតាវិញហើយ ហើយការបិទផ្លូវ ស្ថិតក្រោមការគ្រប់គ្រងវិញបាន ។

ម៉ិកស៊ិកបានពង្រឹងសន្តិសុខនៅរដ្ឋ Jalisco ដែលជាតំបន់កាន់កាប់របស់ក្រុមគ្រឿងញៀន CJNG របស់លោក Oseguera ជាមួយនឹងការដាក់ពង្រាយទាហាន ២ពាន់នាក់ ។

ការស្លាប់របស់លោក Oseguera គឹជាផលប៉ះពាល់មួយចំពោះក្រុមគ្រឿងញៀន CJNG ដែលត្រូវបានគេចាត់ថ្នាក់ថា ជាអង្គការឧក្រិដ្ឋកម្ម ហើយនិងជាជ័យជំនះមួយសម្រាប់រដ្ឋាភិបាលម៉ិកស៊ិក ក្រោយសម្ពាធពីប្រធានាធិបតីសហរដ្ឋអាមេរិកលោក Donald Trump ឲ្យបោសសម្អាតក្រុមមេខ្លោងគ្រឿងញៀនទាំងនេះ ។

ទោះបីជាយ៉ាងណាក៏ដោយ ជ័យជំនះនេះ អាចនឹងនាំឲ្យមានអំពើហិង្សាបន្ថែមទៀតនៅក្នុងប្រទេសដែលកើតមានជាយូរមកហើយការកាប់សម្លាប់មនុស្ស និងការបាត់ខ្លួនមនុស្ស ក្នុងកណ្តាប់ដៃរបស់អង្គការឧក្រិដ្ឋកម្ម ៕