ក្រុមមេដឹកនាំសហភាពអឺរ៉ុប បានសន្យាកាលពីថ្ងៃអង្គារ២៤កុម្ភៈសប្ដាហ៍នេះ ថានឹងមិនបោះបង់ចោលអ៊ុយក្រែនឡើយ ខណៈការវាយលុករបស់រុស្ស៊ីបានឈានដល់ឆ្នាំទីប្រាំ ទោះបីជាការបែកបាក់ក្នុងចំណោមដៃគូរបស់ទីក្រុងគីវ បានគ្របដណ្ដប់លើការរំលឹកដល់ការផ្ទុះឡើងនៃសង្គ្រាមដ៏ធំបំផុតរបស់ទ្វីបនេះក្នុងរយៈពេលជាច្រើនទសវត្សរ៍ក៏ដោយ។

ខួបនៃការចាប់ផ្តើមជម្លោះ កាលពីថ្ងៃអង្គារ ដែលបានសម្លាប់មនុស្សរាប់សែននាក់ និងបំផ្លាញផ្នែកខ្លះនៃអ៊ុយក្រែន បានកើតឡើងមួយថ្ងៃបន្ទាប់ពីប្រទេសហុងគ្រីបានវេតូទណ្ឌកម្មថ្មីរបស់សហភាពអឺរ៉ុបប្រឆាំងនឹងរុស្ស៊ី និងប្រាក់កម្ចីចំនួន៩០ពាន់លានអឺរ៉ូ ស្មើនឹង១០៥ ពាន់លានដុល្លារអាមេរិក ដែលមានសារៈសំខាន់ចំពោះការរស់រានរបស់អ៊ុយក្រែន។

ប្រទេសហុងគ្រី ដែលរក្សាទំនាក់ទំនងជិតស្និទ្ធជាមួយទីក្រុងមូស្គូ និងប្រទេសជិតខាងស្លូវ៉ាគី ចោទប្រកាន់ទីក្រុងគីវថាបានរារាំងការផ្គត់ផ្គង់ប្រេងរបស់រុស្ស៊ីដោយចេតនាតាមរយៈបំពង់បង្ហូរប្រេង Druzhba ដែលអ៊ុយក្រែននិយាយថាខ្លួនកំពុងព្យាយាមជួសជុលបន្ទាប់ពីការវាយប្រហាររបស់រុស្ស៊ីកាលពីខែមុន។  

មន្ត្រីនានា រួមទាំងប្រធានគណៈកម្មការអឺរ៉ុប លោកស្រី Ursula von der Leyen ប្រធានាធិបតីហ្វាំងឡង់ លោក Alexander Stubb និងនាយករដ្ឋមន្ត្រីដាណឺម៉ាកលោកស្រី Mette Frederiksen បានធ្វើដំណើរទៅកាន់ទីក្រុងគីវសម្រាប់ខួបសង្គ្រាមនេះ ប៉ុន្តែមិនត្រូវបានចូលរួមដោយប្រមុខរដ្ឋាភិបាលលោកខាងលិចសំខាន់ៗនោះទេ។

មេដឹកនាំដែលមានវត្តមាននៅក្នុងទីក្រុងគីវបានជួបគ្នាជា «សម្ព័ន្ធភាពនៃឆន្ទៈ»។ នាយករដ្ឋមន្ត្រីអង់គ្លេស លោក Keir Starmer ដែលចូលរួមតាមរយៈវីដេអូ បាននិយាយថា សម្ព័ន្ធមិត្តរបស់អ៊ុយក្រែននឹងត្រូវ «ធ្វើកិច្ចការដ៏លំបាក» ក្នុងការជួយទីក្រុងគីវ និងដាក់សម្ពាធរុស្ស៊ី ។ជាមួយនឹងការចូលរួមពីចម្ងាយនោះដែរ អធិការបតីអាល្លឺម៉ង់លោក Friedrich Merzបាននិយាយថាវាពិតជាសំខាន់ណាស់ក្នុងការបង្ហួតមូលនិធិសង្គ្រាមរបស់រុស្ស៊ីតាមេយៈការជំរុញកញ្ចប់ទណ្ឌកម្មទី២០៕