លោករដ្ឋមន្ត្រីការបរទេស Youssef Rajji បាននិយាយកាលពីថ្ងៃអង្គារថា ប្រទេសលីបង់ ត្រូវបានព្រមានថា ការចូលរួមណាមួយដោយក្រុមហេសបូឡាក្នុងការប្រឈមមុខដាក់គ្នាដែលអាចកើតមានរវាងសហរដ្ឋអាមេរិក និងអ៊ីរ៉ង់ អាចបង្កឲ្យមានការវាយប្រហាររបស់អ៊ីស្រាអែលលើហេដ្ឋារចនាសម្ព័ន្ធសំខាន់ៗ នៅក្នុងប្រទេសនេះ។

នៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម X លោក Rajji បានបញ្ជាក់ថា អាជ្ញាធរលីបង់ត្រូវបានជូនដំណឹងថា អ៊ីស្រាអែលអាចកំណត់គោលដៅលើទីតាំងហេដ្ឋារចនាសម្ព័ន្ធ ប្រសិនបើក្រុមហេសបូឡាចូលរួមក្នុងជម្លោះរវាងសហរដ្ឋអាមេរិក និងអ៊ីរ៉ង់ កាន់តែទូលំទូលាយនោះ។

លោកបាននិយាយថា រដ្ឋាភិបាលលីបង់កំពុងបន្តកិច្ចខិតខំប្រឹងប្រែងផ្នែកការទូត និងនយោបាយ ដើម្បីទប់ស្កាត់ប្រទេសនេះពីការត្រូវបានអូសទាញចូលទៅក្នុងសង្គ្រាមក្នុងតំបន់។

ការអត្ថាធិប្បាយរបស់លោក Rajji បានធ្វើឡើង ស្របពេលមានភាពតានតឹងក្នុងតំបន់កាន់តែខ្លាំងឡើងរវាងទីក្រុងវ៉ាស៊ីនតោន និងទីក្រុងតេអេរ៉ង់។ ក្នុងរយៈពេលប៉ុន្មានសប្តាហ៍ថ្មីៗនេះ សហរដ្ឋអាមេរិកបានពង្រឹងជំហរយោធារបស់ខ្លួននៅមជ្ឈិមបូព៌ា ខណៈដែលមន្ត្រីអ៊ីរ៉ង់បានព្រមានថា ការវាយប្រហារណាមួយលើអ៊ីរ៉ង់ នឹងបង្កឲ្យមានការប្រឈមមុខដាក់គ្នាកាន់តែធំឡើងនៅទូទាំងតំបន់។

ប្រទេសលីបង់ ដែលនៅតែកំពុងងើបឡើងវិញពីសង្គ្រាមឆ្លងដែនដ៏សាហាវរវាងអ៊ីស្រាអែល និងក្រុមហេសបូឡា ក្នុងឆ្នាំ ២០២៤ មានការភ័យខ្លាចថា សង្គ្រាមរវាងសហរដ្ឋអាមេរិក និងអ៊ីរ៉ង់ អាចប្រែក្លាយទឹកដីរបស់ខ្លួន ទៅជាសមរភូមិម្តងទៀត៕