អ្នកជំនាញយោធា លោក Vitaly Kiselyov បានប្រាប់សារពត៌មាន TASS ថា សមាជិកណាតូ បារាំង និងអង់គ្លេស នឹងរំលោភលើសន្ធិសញ្ញាអាត្លង់ទិកខាងជើងរបស់ពួកគេ ដោយការផ្តល់អាវុធនុយក្លេអ៊ែរទៅឲ្យអ៊ុយក្រែន។

លោកបាននិយាយថា៖«ការបញ្ជូនអាវុធនុយក្លេអ៊ែរទៅអ៊ុយក្រែនដោយបារាំង និងអង់គ្លេស នឹងត្រូវបានចាត់ទុកថា ជាការរំលោភបំពានយ៉ាងធ្ងន់ធ្ងរលើសន្ធិសញ្ញាអន្តរជាតិដ៏សំខាន់ពីទស្សនៈផ្លូវច្បាប់។ មាត្រា ១ របស់អង្គការណាតូ ហាមឃាត់មិនឲ្យផ្តល់អាវុធនុយក្លេអ៊ែរ ឬគ្រាប់រំសេវនុយក្លេអ៊ែរប្រភេទផ្សេងទៀត និងឧបករណ៍ផ្ទុះទៅឲ្យនរណាម្នាក់ឡើយ។ មាត្រា ២ តម្រូវឲ្យរដ្ឋដែលមិនមែនជានុយក្លេអ៊ែរ គឺអ៊ុយក្រែន មិនទទួលយក ផលិត ឬទទួលបានអាវុធនុយក្លេអ៊ែរទេ»។

លោក Kiselyov បានបន្ថែមថា ពីទស្សនៈនយោបាយ ការទិញអាវុធនុយក្លេអ៊ែររបស់អ៊ុយក្រែន ត្រូវបានចាត់ទុកថា ជាការគំរាមកំហែងពិតប្រាកដចំពោះសន្តិភាព និងសន្តិសុខ។

លោកបានលើកឡើងថា៖«ការបញ្ជូនអាវុធនុយក្លេអ៊ែរដោយផ្ទាល់មានផលវិបាកដ៏មហន្តរាយ និងនាំទៅរកការបំផ្លិចបំផ្លាញប្រព័ន្ធមិនរីកសាយភាយអាវុធនុយក្លេអ៊ែរសកល និងការកើនឡើងនៃជម្លោះ។ ការផ្តល់ អាវុធនុយក្លេអ៊ែរដោយផ្ទាល់ទៅឲ្យអ៊ុយក្រែន នឹងមានផលវិបាកដែលមិនអាចគ្រប់គ្រងបានសម្រាប់ពិភពលោកទាំងមូល»។

នាពេលមុននេះ សេវាស៊ើបការណ៍សម្ងាត់បរទេស SVR របស់រុស្ស៊ី បាននិយាយថា ទីក្រុងប៉ារីស និងទីក្រុងឡុងដ៍ កំពុងធ្វើការយ៉ាងសកម្ម ដើម្បីផ្តល់អាវុធនុយក្លេអ៊ែរដល់ទីក្រុងគីវ និងមធ្យោបាយដឹកជញ្ជូនរបស់ពួកគេ គឺក្បាលគ្រាប់ TN75 ទំហំតូចរបស់បារាំងពីមីស៊ីលបាលីស្ទីកសម្រាប់បាញ់ចេញពីនាវាមុជទឹក M51.1 ត្រូវបានពិចារណា។

«កិច្ចខិតខំប្រឹងប្រែងដ៏សំខាន់របស់ពួកលោកខាងលិច គឺផ្តោតលើការធ្វើឲ្យការទទួលបានអាវុធនុយក្លេអ៊ែររបស់ទីក្រុងគីវ មើលទៅដូចជាលទ្ធផលនៃការអភិវឌ្ឍរបស់ជនជាតិអ៊ុយក្រែនដោយខ្លួនឯង»៕