មន្ត្រីប្រទេសលោកខាងលិចម្នាក់និយាយថា រុស្ស៊ីបានបាត់បង់បុគ្គលិកយោធាច្រើនជាងអ្វីដែលខ្លួនអាចជ្រើសរើសបាន។ មន្ត្រីនឹងតាមដានយ៉ាងដិតដល់ពីរបៀបដែលកង្វះទាហានធ្វើឲ្យប៉ះពាល់ដល់វិមានក្រឹមឡាំង។ 

មន្ត្រីរូបនេះនិយាយថា ខណៈរុស្ស៊ីបានជ្រើសរើសកងទ័ពប្រហែល ៣០.០០០នាក់ ទៅ ៣៥.០០០ នាក់ក្នុងមួយខែ ប្រទេសនេះមានទាហានស្លាប់និងរបួសកាន់តែច្រើនក្នុងរយៈពេលបីខែកន្លងទៅនេះ។

មន្ត្រីនិយាយបន្តថា សមត្ថភាពរបស់រុស្ស៊ីក្នុងការវាយលុកក្នុងរដូវក្តៅនឹងអាស្រ័យលើកម្លាំងទាហាន ដែលបង្ហាញថាកង្វះទាហានអាចធ្វើឲ្យប៉ះពាល់ដល់ប្រតិបត្តិការរបស់រុស្ស៊ីដែលគេជឿថាត្រូវបានគ្រោងទុកសម្រាប់រដូវក្តៅ។ ទន្ទឹមនឹងនេះ មន្ត្រីជាន់ខ្ពស់ម្នាក់នៃក្រសួងការពារជាតិអង់គ្លេសបានប្រាប់អ្នកសារព័ត៌មានថា ចំនួនអ្នកស្លាប់និងរបួសរបស់រុស្ស៊ីត្រូវបានគេជឿថាលើសពី១,២៥លាននាក់ចាប់តាំងពីការឈ្លានពានរបស់ខ្លួនលើអ៊ុយក្រែនចាប់ផ្តើម។

មន្ត្រីដដែលនិយាយថា ការបាត់បង់របស់រុស្ស៊ី «មិនអាចនឹកស្មានដល់» ដោយតួលេខនេះខ្ពស់ជាងអ្នកស្លាប់និងរងរបួសរបស់សហរដ្ឋអាមេរិកទាំងអស់កាលពីក្នុងសង្គ្រាមលោកលើកទី២ ហើយរុស្ស៊ីបានធ្វើសង្គ្រាមនៅអ៊ុយក្រែន យូរជាងអតីតសហភាពសូវៀតក្នុងសង្គ្រាមលោកលើកទី២។